Sistemit VAR po ia “bëjnë benë” në Gjermani

Sistemi VAR (Video Assistant Referee) nuk po “shtyhet” hiç në Gjermani. Pavarësisht se jemi ende në fillim sezonit, shumë ekspertë të futbollit “e kanë kthyer pllakën”, pasi votuan pro këtij sistemi në fillim.

Ish-arbitri ndërkombëtar Markus Merk, në një opinion dhënë për gazetën “Kicker” shpjegon: “Në fillim kishim një qëndrim pozitiv ndaj këtij sistemi. Tani më duket se cenohet diçka dhe kam dyshimet e mia se vlen”. I bën edhe më shumë eko trajneri i Borusias së Myncegladbahut, Dieter Hecking, i cili njihet edhe për qëndrime disi konservatore. “Unë mendoj se ky projekt do të arkivohet shpejt, për mua që në këtë pauzë dimërore” – është shprehur ai.

Një tjetër zë “i lartë” e sheh me rezerva sistemin VAR, pikërisht ish-mbrojtësi i Kombëtares gjermane, sot Drejtori Sportiv i Shtutgard, Stefan Rojter. “Kam besuar se ishte një sistem i mirë, por në fakt nuk më pëlqen për gjë” – ka deklaruar pa rezerva ai.

Me kaq shumë zëra kundër, e me rezervën e madhe të cdokujt, se ky sistem i heq pjesën njerëzore sportit, VAR – it duket se po ia “bëjnë benë” në Gjermani. E siç thuhet në celuloidin shqiptar, po ta bënë benë ata, të puth halla në të dy faqet. /tesheshi.com/