Nisin të vijnë sirianët në Shqipëri. Përpara se qeveritë e Tiranës dhe Athinës të bien dakord për të zgjidhur çështjen e devijimit të një pjese të refugjatëve, strukturat e mafies në të dy vendeve i kanë mbaruar punët.
Siç bën të ditur e përditshmja greke Kathimerini, struktura kriminale në veri të Greqisë që përbëhen edhe nga emigrantë shqiptarë kanë nisur ndërlidhjen me bandat shqiptare që kanë bashkëpunim me pjesë të policisë shqiptare.
Prej disa ditësh këto grupime kriminale kanë marrë para të shumta nga refugjatët sirianë që gjenden në kampet e veriut të Greqisë dhe kanë nisur të trafikojnë në Shqipëri. Bëhet fjalë për grupe familjesh me gjendje të mirë ekonomike, të cilat kanë paguar edhe nga 10 mijë euro për emigrant për t’i dërguar në Gjermani. Bëhet fjalë për një mafia që kontrollohet nga banda të fuqishme që kontrollojë trafiqet në Austri, të cilët kanë lidhje me “degët” e tyre në Shqipëri dhe Greqi.
Kjo strukturë është pikasur nga policët gjermanë që ndodhen prej një viti në Kakavije, të cilët kanë përgjuar telefonatat dhe zbuluar një pjesë të trafikut.
Vetëm sot në pikën kufitare të Kakavijës është kapur një pjesë e këtij trafiku, ku një shqiptar dhe 6 sirianë u gjetën në një automjet duke shkuar drejt Gjirokastrës.
Sirianët kishin hyrë ilegalisht nga kufiri jeshil me Greqinë dhe po lëviznin në drejtim të Gjirokastrës. Policia e Gjirokastrës, bën të ditur se shtetasit sirianë u kthyen në Greqi dhe janë vendosur në kampin e Janinës./tesheshi.com/
