Presidenti rus Vladimir Putin dhe kancelarja gjermane Angela Merkel u takuan afër Berlinit për të diskutuar çështjet e konfliktit në Ukrainë, Siri, Iran dhe projektin e një gazsjellësi që ka shkaktuar zemërimin e Shteteve të Bashkuara.
Reuters raporton se Merkel ka thënë se të dy vendet, dhe në veçanti Rusia si një anëtare e përhershme e Këshillit të Sigurimit të Kombeve të Bashkuara, kanë përgjegjësi për t’i adresuar këto probleme.
“Mendoj se çështjet mund të zgjidhen në dialog dhe përmes dialogut”, u tha Merkel gazetarëve përpara bisedës me Putinin, në Meseberg pranë Berlinit.
Të dy shprehën shqetësimin për Sirinë dhe për vuajtjet e shumë refugjatëve të krijuar nga lufta shtatëvjeçare siriane.
Merkel ka thënë se është e nevojshme për të shmangur një krizë humanitare në Idlib dhe rajonin përreth.
Putin u tha gazetarëve se gjithçka duhet bërë për të ndihmuar refugjatët sirianë të kthehen në vendin e tyre dhe se Siria ka nevojë për ndihmë për rindërtim.
Sipas tij, fluksi i refugjatëve sirianë në Evropë përfaqëson një barrë potencialisht “masive”, sipas DPA.
Merkel u përball me një presion të madh politik për të hapur kufijtë e Gjermanisë për qindra mijëra sirianë dhe emigrantë të tjerë tre vjet më parë.
Rusia, përkrahës kryesor ushtarak i qeverisë siriane, në muajt e fundit ka ndryshuar fokusin e veprimit me bombardimin e krijimit të zonave të sigurta, për të lejuar refugjatët sirianë të kthehen në atdheun e tyre.
Ndërsa lidhur me Ukrainën, Merkel tha se ajo shpreson që me filimin e të vitit të ri shkollor, forcat ukrainase dhe ato separatiste të largohen nga vija e frontit në Donbass.
Merkel dhe Putin diskutuan dhe mbi perspektivat për misionin paqeruajtës të Kombeve të Bashkuara në Ukrainën lindore, tha DPA.
“Ne duhet të pranojmë se nuk kemi një armëpushim të përhershëm”, tha Merkel.
Putin shprehu shpresën se misioni i OKB-së mund të rivendoste paqen në rajonet lindore që kufizohen me Rusinë.
Dhe kur është fjala për ndërtimin e tubacionit të planifikuar të gazit Nord Stream 2, e cila do të sjellë gazin rus nën Detin Baltik në Gjermani, Merkel tha se Ukraina duhet të vazhdojë të luajë një rol në tranzitin e gazit në Evropë dhe përshëndeti fillimin e bisedimeve në mes të Bashkimit Evropian, Ukrainës dhe Rusisë.
Putin u tha gazetarëve se tubacioni është thjesht një projekt ekonomik.
“Dua të theksoj se gjëja kryesore është se tranziti ukrainas, i cili është tradicional për ne, i plotëson kërkesat ekonomike,” tha ai. “North Stream 2 është ekskluzivisht një projekt ekonomik.”
Shtetet e Bashkuara po bëjnë presion ndaj Gjermanisë për të ndaluar punën mbi tubacionin, duke deklaruar se do të rrisë varësinë e energjisë nga Gjermania ndaj Rusisë. /tesheshi.com/
