Forcat besnike të presidentit sirian Bashar al-Asad dhe një grupi të huaj terrorist të mbështetur nga Irani po përdorin artileri për të djegur të mbjellat e banorëve të zonave rurale të Idlib dhe Alepo, njoftoi Agjensia Anadolu (AA).
Sipas informacioneve të marra nga gazetari i AA, forcat e regjimit të stacionuara në veri-lindje të Idlib me topa dhe mortaja po veprojnë në vendin e quajtur Teftenaz, në fushat e mbjella dhe kështu digjen të lashtat e popullatës lokale.
Kryetari i këshillit lokal në Teftenaz, Munir Hatib, i tha reporterit AA se sulmet e forcave të regjimit mbi Serakib gjatë gjithë rrugës për në fshatin Kefer Halep janë intensifikuar, që prej fillimit të sezonit të korrjes.
Duke deklaruar se forcat e regjimit po synojnë makinat e vjeljeve të vendosura në fushat afër vijës së parë nën kontrollin e opozitës, Hatib theksoi se qëllimi i sulmeve të tilla është të lënë civilët të uritur.
Përfaqësuesit e Mbrojtjes Civile deklarojnë se ata nuk janë në gjendje të shuajnë zjarret në fusha, duke marrë parasysh që ato janë në afërsi të vijës së parë.
Forcat e Asadit kanë përdorur më parë këtë metodë të njohur si “bombë e urisë”, me të cilën ata shkatërrojnë me qëllim tokën e punueshme. Kështu, në 2018 dhe 2019, dhjetëra hektarë të mbjellë me grurë dhe elb u shkatërruan në Idlib dhe Hama.
Në mars të këtij viti, Turqia dhe Rusia ranë dakord për një protokoll që u bën thirrje të gjitha palëve në Idlib që të ndërpresin zjarrin, dhe forcat turke dhe ruse si garantues të armëpushimit po kryejnë bashkërisht patrulla kontrolli përgjatë linjave të ndarjes, pra përgjatë autostradës M4. Patrullimet e përbashkëta filluan më 6 mars.
Idlib është enklava më e madhe e kontrolluar nga opozita siriane, e cila është nën rrethim nga forcat besnike të regjimit të Bashar al-Asadit dhe aleatëve të tij.
Turqia dëshiron të mbrojë civilët në rajon dhe ta pastrojë atë nga elementët terroristë. Ankaraja Zyrtare mbron krijimin e një zone të sigurt për civilët përgjatë zonës kufitare siriane, e gjitha për të ndihmuar ata civilë dhe për të parandaluar një valë të re të migrantëve në Turqi dhe Evropë. /tesheshi.com/
