Kryeministri ende në detyrë i Malit të Zi, shqiptari Dritan Abazoviç, promovoi një libvër dhe morri një titull – Doctor Honoris Causa – në Tiranë, te Universiteti Mesdhetar, me president Anastas Angjelin.
Kryeministri Rama i pranishëm në ceremoni, tha se e kishte si privilegj njohjen dhe miqësinë me Abazoviçin, pasi sipas tij është një fenomen.
“Jam i vetmi në këtë sallë, përfshi dhe kameramanët, që nuk kam master. Shpresoj që do jeni zemërgjerë dhe do bëni skonto duke më toleruar nivelin e ulët akademik që kam. Por përtej kësaj, besoj do ishte mungesë sinqeriteti të thosha që e kam lexuar librin.
Nuk e kam lexuar se e kam marrë para dy ditësh. Por ishte një surprizë e bukur, se nuk e dija që Dritani do ishte kaq thellë në këtë fushë.
Unë jam këtu për t’ju thënë fjalë që nuk do jenë domosdoshmërisht për librin, por për autorin dhe shpresoj do ndihmojmë që të jeni më të nxitur që ta merrni dhe lexoni librin.
Për të bërë këtë, bëra atë që bëhet zakonisht kur nuk ke lexuar librin, e hapa në fillim, në mes dhe në fund. Unë jam shumë i privilegjuar të jem mik i Dritan Abazovic. Ai është një fenomen në politikën ballkanike, krejt i veçantë dhe i pakrahasueshëm me askënd tjetër”, u shpreh Rama.
Ndërsa në një dalje për mediat, Abazoviç foli mbi qeverisjen e tij, nën një gjendje tejet anormale, shkaktuar dhe prej vendimmarrjeve të tij.
“Ishte një konfuzion politik, mirëpo qeveria në mandatin teknik punon më mirë se sa në mandatin e plotë. Sigurisht që kam bërë dhe unë gabime. Ne kemi ofruar modelin që mundet me qenë produktiv për Malin e Zi. Jam shumë krenar me arritjet e fundit që janë bërë në 8 muajt e fundit në qeverinë e Malit të Zi”, tha ai. /tesheshi.com/
