Kryeministrat e Ballkanit kanë zhvilluar një garë të vërtetë dje në Londër për të thithur paratë e Bankës Europiane për Rindërtim dhe Zhvillim, BERZH-it.
Institucioni financiar që ka si aksionerë kryesisht institucionet e Brukselit, në fund ka ndjekur një politikë për t’i kënaqur të gjithë.
Kështu, ndërsa ka miratuar 12 milionë euro për linjën e energjisë elektrike mes Shqipërisë dhe Maqedonisë, janë dhënë 37 milionë euro për Serbinë, Bosnjë-Hercegovinën dhe Malin e Zi të marrë së bashku, për të ndërtuar një linjë interkonjeksioni.
Por Serbia ka marrë edhe një investim plus për kryeqytetin e vet, Beogradin.
Kryebashkiaku Sinisha Mali, tha se BERZH ka akorduar në total 10 milionë euro për transportin publik në Beograd.
Pikërisht, kjo politikë diferencuese është thumbuar edhe nga kryeministri shqiptar Edi Rama, i cili ka thënë se Beogradi favorizohet ngaqë ka mbrapa Rusinë.
Ndërkaq, Presidenti i BERZH-it, Suma Chakrabarti tha se mbështetja e projekteve të rëndësishme infrastrukturore rajonale, si dhe krijimi i tregjeve të integruara të energjisë, rrit sigurinë energjitike.
“Ky projekt shënon një hap të rëndësishëm drejt krijimit të një tregu rajonal të energjisë elektrike. Ne jemi të kënaqur që do të ketë një kontribut nga BE në këtë projekt shumë të rëndësishëm”, tha Chakrabarti.
Drejtori i Përgjithshëm për Zgjerimin në Komisionin Evropian, Christian Danielsson, shtoi se ky projekt është pjesë e përpjekjeve të KE-së për të mbështetur axhendën e lidhjes së Ballkanit Perëndimor.
“Ndërtimi i kësaj linje të transmetimit do të përmirësojë sigurinë e furnizimit dhe stabilitetin e sistemeve të energjisë të të dy vendeve. Kjo gjithashtu do të ndihmojë në zhvillimin e një tregu rajonal të energjisë elektrike, në të cilin, prodhimi dhe kapaciteti i transmetimit mund të menaxhohet në të gjithë Ballkanin Perëndimor”, tha ai.
Ky projekt është pjesë e iniciativës së Komisionit Evropian për të krijuar një korridor Lindje-Perëndim të transmetimit të energjisë elektrike midis Bullgarisë, Maqedonisë, Shqipërisë, Malit të Zi dhe Italisë, duke përfshirë kabllin e planifikuar nënujor nga Mali i Zi në Itali, një hap i rëndësishëm drejt krijimit të një tregu rajonal të energjisë elektrike.
Bashkimi Evropian është donatori më i madh i vetëm i BERZH-it. Në vitin 2015 ajo vuri në dispozicion 179 milionë euro, rreth gjysmën e totalit të fondeve të donatorëve, për këtë institucion të rëndësishëm financiar, ku i kanë sytë të gjithë vendet e Ballkanit dhe qeveritë e tyre respektive. Përgatiti: Ermir Hoxha – /tesheshi.com/
