Justin Trudeau, kryeministri kanadez, siç ka bërë dhe herë të shkuara, kur i ka uruar muslimanët për festat e tyre e është ulur bashkë me ta, ka përcjellë një urim për nisjen e muajit të shenjtë të Ramazanit.
Në pamjet filmike të bëra publike në llogarinë e Justin Trudeau-t në Twitter, ai e nis urimin me Esselamu alejkum, ndërsa deklarata e tij me këtë rast thotë mes të tjerash:
“Sonte (26 maj) në të ngrysur, muslimanët në Kanada dhe rreth e qark botës do të shënojnë nisjen e Ramazanit.
“Ramazani është një kohë e shenjtë e vitit për bashkësinë muslimane, dhe përkujton zbritjen e Kur’anit Profetit Muhammed. Udhëtimi njëmujor i agjërimit dhe lutjes nxit rritjen shpirtërore, reflektimin, e dhembshurinë për ata me më pak fat.
“Ramazani është gjithashtu kohë e bashkësisë, kur muslimanët mblidhen me familjen dhe miqtë për t’u falur dhe për të ndarë iftarin, ushqimin e mbrëmjes. Për të tërë ne, Ramazani është një kujtesë për t’i vlerësuar dhuratat e shumta që na janë dhënë, e për të dhënë bujarisht për të tjerët, në bashkësitë tona dhe anekënd botës.
“Në emër të familjes sime, Sophie dhe unë u përcjellim urimet më të mira bashkësive muslimane këtu në Kanada dhe ngado në botë.” /tesheshi.com/
