I përfshirë tashmë në serinë e takimeve diplomatike pas ngjitjes në postin e lartë të kreut të Kuvendit të Kosovës, Kadri Veseli është takuar me ish-kryeministrin Toni Bler gjatë një vizite zyrtare në Britaninë e Madhe.
Ngjashëm siç ndodh në dashurinë e parë, Veseli e ka ndarë lumturinë e tij personale pas këtij takimi me një ndër ish-liderët botërore, për më tepër i angazhuar fuqimisht për goditjen ushtarake të Millosheviçit përgjatë muajve të dramës kosovare në ’99-ën, me anë të një mesazhi në FB:
“Toni Bler, si për çdo qytetar të Republikës së Kosovës, ashtu edhe për mua, sjell emocione të rralla në takim. Emocione sa miqësore aq edhe humane. E falënderova ish kryeministrin Bler për këtë. Sot, ne kemi nevojë për angazhimin e miqve tanë, të risjellin vëmendjen në Republikën e Kosovës, me qëllime e synime tjera. Ato të zhvillimit ekonomik dhe hapjen e vendeve të reja të punës. Kemi shumë argumente se kemi punuar dhe do të punojmë edhe më shumë në këtë drejtim, por kemi nevojë edhe për miq që do ta promovojnë këtë përkushtim tonin, përvoja e ekspertiza të reja në këtë fushë. Toni Bler, të faleminderit”, ka shkruar Veseli. /tesheshi.com/
