Dita në Shqipëri ka nisur me dy shpërthime tritoli: një në Lezhë e një në Vlorë.
Në Lezhë, më saktë në Balldre, tritoli i është vënë gazetarit të News 24, Elidon Ndreka.
Ai tha se e kishte të pamundur të akuzonte kënd, veç faktit se kjo mund të kishte lidhje me profesionin.
“Prindërit janë në moshë janë të dy profesionist unë prej vitesh ushtroj profesionin e gazetarit e vetmja indidicie mund të jetë puna që bëj por s’di të drejtoj gishtin pasi çdo ditë unë jam në terren. Kjo ngjarje është mjaft e rëndë dhe do të doja që çdo koleg ta mendojë si për vete, pasi në shtëpi jetoj me babin, mamin, bashkëshorten dhe dy vajzat”, tha gazetari Elidon Ndreka.
Më tej, në Vlorë, ngjashëm e ka pësuar dhe Tahsim Xheladin Banushaj, 69 vjeç.
“Ishim në gjumë ora 3 pa 10 pa çerek. Dëgjojmë krismë zhurma e dinamiti. U ngritëm…obobo tërmet i them gruas. Dal shikoj asgjë nuk kishte. Marrr prozhektorin dhe s’kishte asgjë. Më tha gruaja dil njëherë e shiko te komshiu. Dola dhe i thashë: ‘grua kjo qenka ‘dasma jonë’. Dikush mund të më ketë ndonjë borxh por jo unë njeriu. Unë jetoj vetëm me gruan, fëmijët i kam të shpërndarë”, tha ai.
Kujtojmë se për javë me radhë, në vitin 2014, Shqipëria u karakterizua nga vënie tritoli, që siç u shfaq, ashtu dhe u zhduk si fenomen pa ndonjë arsye të qartë. /tesheshi.com/
