Përfaqësuesja e Lartë e Bashkimit Evropian për Politikë të Përbashkët të Jashtme dhe Siguri, Kaja Kallas dhe Komisionerja Evropiane për Zgjerim, Marta Kos, njoftuan se presin me padurim formimin e Kuvendit dhe Qeverisë së re të Kosovës dhe theksuan se përparimi në normalizimin e marrëdhënieve me Serbinë është e vetmja mënyrë që Kosova të përparojë në rrugën e saj evropiane.
“U bëjmë thirrje autoriteteve në Kosovë që të angazhohen në bashkëpunim të përgjegjshëm rajonal dhe të intensifikojnë përpjekjet e tyre për të forcuar sundimin e ligjit dhe administratën publike dhe mbrojtjen e lirisë së shprehjes. Progresi në normalizimin e marrëdhënieve me Serbinë është e vetmja mënyrë që Kosova të bëjë përparim në rrugën e saj evropiane”, kanë thënë Kallas dhe Kos në një deklaratë të përbashkët me rastin e zgjedhjeve të mbajtura në Kosovë.
Në deklaratë theksohet se “Kosova pritet të zbatojë obligimet e saj që dalin nga Marrëveshja për rrugën drejt normalizimit, si dhe të gjitha marrëveshjet e mëparshme nga Dialogu pa vonesa apo parakushte të mëtejshme” dhe shtohet se “Nuk ka alternativë ndaj dialogut të udhëhequr nga Bashkimi Evropian”.
Zgjedhjet ishin të qeta
Sipas rezultateve preliminare të zgjedhjeve parlamentare në Kosovë të 9 shkurtit, Lëvizja Vetëvendosje e kryeministrit Albin Kurti ka fituar më shumë vota, por jo aq sa për të formuar vetë qeverinë.
Kallas dhe Kos vlerësuan se zgjedhjet “u zhvilluan në mënyrë paqësore dhe në frymën e konkurrencës, me pjesëmarrjen e të gjitha komuniteteve dhe zbatimin e ligjit të ri zgjedhor” dhe se “fushata ishte dinamike, dhe i gjithë procesi tregoi qëndrueshmëri dhe përkushtim ndaj parimeve demokratike”.
Duke kujtuar se Kosova ka dorëzuar aplikacionin për anëtarësim në BE në dhjetor të vitit 2022, deklarata shton se “Komisioni Evropian mbetet i gatshëm të përgatisë një opinion për aplikimin e Kosovës për anëtarësim sapo ta kërkojë Këshilli”. /tesheshi.com/
