Kur Rama vuante në opozitë, në një përpjekje titane për të ardhur në pushtet, me një Berishë që dukej i parrëzueshëm me votë normale, Pandeli Majko do thoshte pak a shumë se kur do vijë ajo ditë që Rama ta tregojë veten si qeveritar i aftë, pasi si politikan i aftë nuk po dukej. Pra, në gjykimin publik, si dhe atë të Majkos, Rama po shfaqej i dështuar në shahun politik të ardhjes në pushtet, gjë kompensohej me atë qënit, hipotetikisht, i aftë për të qeverisur. Dhe nuk duhen ngatërruar politikani me qeveritarin. Vërtet që një qeveritar i mirë jo doemos është dhe politikan i mirë. Politikë është aftësia për t’i dhënë vetes pushtet, qeverisja është përligjja e pushtetit.
Dhe sot, duke parë se në ç’stad është Rama pas një dekade qeverisjeje, ngjan e kundërta e asaj që do thoshte Majko: Rama ngjan me një qeveritar plot defekte, deri dhe të dështuar në shumë aspekte, ama shumë lart në shahun politik si një lojtar gati i pasfidueshëm.
Tubimi në Athinë ishte afirmim pikërisht i aftësisë politike mbi atë qeverisëse.
Është ky një leksion si për opozitën e lodhur e si për aspirantët e rinj për pushtet, se si talenti ose vetëkultivimi politik është i pashmangshëm për të siguruar pushtet e mbajtur pushtet, edhe nëse je qeveritar i suksesshëm, gjë që nuk ndodh aq idealisht sa ç’pretendohet nga ata që ende kanë vetëm fjalën e asgjë tjetër sot për sot. /tesheshi.com/
