Lulzim Basha ka marrë sot nga një aleat shumë i rëndësishëm i Partisë Demokratike ofertën më të rëndësishme politike, apo siç mund të quhet lirisht si “oferta e jetës” për të, qëkur mori drejtimin e selisë blu dhe të opozitësh shqiptare në verën e vitit 2013.
Numri dy i partisë së kancelares Angela Merkel, pra CDU(Partia Kristian Demokrate) dhe CSU (Partia Kristian Sociale), Franz Josef Jung, ministër i Mbrojtjes së Gjermanisë dhe numri dy i partisë në pushtet në Gjermani, i ka dërguar një letër zyrtare Bashës ku i bën një “ofertë që nuk mund të refuzohet”.
Basha mund të ndjehet i përkëdhelur se një zyrtar kaq i lartë i vendit më të rëndësishëm në Europë dhe më të fuqishmit ekonomikisht pas SHBA-së, i ka dërguar atij një letër nominale.
Por shihet qartë se nuk ka të bëjë thjesht me Bashën, edhe pse atij i jepet një shans i madh që të jetë realisht edhe de facto kandidati zyrtar për kryeministër i ardhshëm i Shqipërisë.
Letra e Jung shpreh qëndrimin e palëkundur të Gjermanisë për Reformën në Drejtësi.
Kujtojmë se ka qenë Angela Merkel e cila në vitit 2014 ka thirrur Edi Ramën në Berlin, ku i ka thënë frazën e famshme që kryeministri e përmend shpesh: “Kancelarja më tha: a jeni ju të gatshëm të hyni në BE me atë drejtësi të korruptuar?”
Pra, Gjermania mund të konsiderohet dhe si pikënisja e reformës së bujshme, e parë aksionere e saj, marrë më pas në dorë nga SHBA-ja dhe BE-ja.
Drafti është hartuar nga EURALIUS i drejtuar nga gjermani Reinhard Deville që PD e akuzoi dhe e zboi “se ka humbur në përkthim”.
Jung, në letrën ndaj Bashës thekson se Reforma në Drejtësi është një investim i qartë gjerman dhe si i tillë i kërkon Partisë Demokratike të zbatojë angazhimin e dhënë me votën e 22 korrikut.
Ndërkaq, përveç aspektit të këtij interesimi në një nivel kaq të lartë, CDU madje edhe vetë kancelarja Merkel është angazhuar ne negociata direkte telefonike me Lulzim Bashën në korrik.
Ka qenë zonja Merkel dhe zyrtarja e lartë e DASH, Victoria Nuland që me dashamirësi i dhuruan Lulzim Bashës 50% e të drejtës për të vendosur anëtarët e komisioneve të vettingut. Pra e bënë aksioner të drejtësisë së re dhe jo thjesht një opozitë kontrolluese, duke ia hequr nga goja pretendimin se Rama po kap drejtësinë. Dhe në këtë rast, zyrtari i lartë gjerman i kujton Bashës këtë favor apo kartë politike që ka marrë nga zonja Merkel.
Ndërkaq, në mënyrë të qartë dhe të detajuar, Jung i ofron Lulzim Bashës një rrugë për daljen nga çadra. Që përkthehet: Garanci për zgjedhjet dhe kontrollin që shqetësimin se baronët e drogës mund të kontrollojnë zgjedhjet. Pikërisht për këtë dhe vetëm për këtë mund të diskutohet me mazhorancën dhe këtë ai e thotë qartë në letrën e tij.
“E rëndësishme është të gjendet një rrugë e pranueshme nga të gjithë për të dalë nga kjo situatë e ngatërruar”, thotë Jung në letrën e tij, ku i përjashton në mënyrë të qartë kushtet ultimative: “ne mendojmë se është rruga e gabuar, që ky problem mund të zgjidhet përmes bojkotit parlamentar dhe deklarimin e mosregjistrimit për zgjedhjet e 18 qershorit, nëse qeveria e zgjedhur shqiptare nuk jep menjëherë dorëheqjen dhe të zëvendësohet me një qeveri teknike nga të gjitha grupet parlamentare”, thuhet në letrën e zyrtarit gjerman.
Pra, kemi të bëjmë fiks me të njëjtën ofertë që Kryeministri Edi Rama i bën publikisht opozitës në dy të diela rresht: negociata edhe në çadër për zgjedhjet, por jo qeveri teknike dhe shtyrje të zgjedhjeve.
Dashamirësia gjermane, e njohur në shumë raste, vazhdon edhe në letrën e sotme për Lulzim Bashën kur CDU shprehet e gatshme të shërbejë si “notere” apo garante e një marrëveshjeje mes tij dhe Edi Ramës.
Pra të lehtësojë kontaktet mes palëve, në mënyrë që PD të shuajë mosbesimin që mund të ketë ndaj mazhorancës, apo dhe drojën para elektoratit të saj që pret me bujë rrëzimin e qeverisë, të fryrë si tollumbace nga Basha.
Dhe këtu partia e kancelares Merkel është e gatshme të luajë reputacionin e saj, por jo si më 22 korrik kur i dha konçension dhe më pas Basha e rrëzoi me mosvotimin e komisioneve të vettingut.
Kjo ofertë theksohet në mënyrë të qartë se është shansi i fundit për kreun e PD-së, pasi Jung përmend edhe reperkursionett kur i kujton Bashës izolimin ndërkombëtar.
“Vonesa e reformës në drejtësi dhe bojkoti i zgjedhjeve nga opozita do ta kthenin Shqipërinë shumë mbrapa në rrugën e saj drejt Bashkimit Europian dhe do të dëmtonte shumë marrëdhëniet mes PD-së dhe CDU-CSU. Kjo nuk është në interesin tonë”, thuhet në letrën e Jung, i cili ka edhe “bekimin” e zonjës Merkel.
Bashës është bërë e ditur se nuk ka rrugë tjetër, asnjë, nëse kërkon të jetë partneri i Gjermanisë në planin e saj për të stabilizuar Ballkanin dhe për ta pastruar nga korrupsioni sipas këtij plani.
Ndryshe, siç thonë gjermanët: “Auf Ëiedersehen”. Që po ta përkthesh sipas fjalorit të ri që solli “gjuhtari” Ilir Beqaj nuk do të thotë thjeshtë “Mirupafshim” por “Suksese në Jetë”! /tesheshi.com/
