Replika të ashpra ka pasur ditën e sotme mes kreut të grupit parlamentar të PD-së, Edi Paloka dhe kryeministrit Edi Rama, në lidhje me ndalimin e Emiljano Shullazit. Sipas Palokës, rasti i Shullazit ka vërtetuar dy nga makthet e Ramës, “një drejtësi që nuk është kapur totalisht prej tij dhe që mund t’i dalë dhe jashtë kontrollit dhe zgjedhjet e lira dhe të ndershme”.
Sipas Palokës, Rama nuk e do Byronë e Hetimit që nuk varet nga Saimir Tahiri, sepse trembet se si Shullazi mund të përfundojë edhe vetë.
Nga ana tjetër, Rama u shpreh se ndalimi i Emiljano Shullazit është bërë nga policia, ndërsa shtoi se Partia Demokratike flet për të sikur e ka bërë ajo arrestimin.
Rama bëri me dije se policia kërkoi autorizim nga Prokuroria për të vendosur nën përgjim dhe ndjekje Shullazin, duke thënë se Policia e Shtetit nuk bën përgjime ilegale.
“Ndalimi është bërë nga policia e cila ka nisur procedurën pa pasur një denoncim konkret por duke u nisur vetëm nga një indicie e paprovuar. E ka ndaluar dhe më pas ka kërkuar nga Prokuroria autorizimin për arrestim dhe e ka marrë pas mesnate ndërkohë që personazhi në fjalë ishte në qeli”, u shpreh Rama. /tesheshi.com/
