Lisa Marie Presley, vajza e Elvis Presley-t, ka vdekur në moshën 54-vjeçare pasi pësoi një atak në zemër në shtëpinë e saj. Lajmi për vdekjen e saj erdhi pak orë pasi ajo përfundoi në spital.
TMZ raportoi mbrëmë se paramedikët kryen CPR në shtëpinë e saj përpara se ta çonin në spital. Thuhet se dikush i dha asaj epinefrinë në vendngjarje për të ndihmuar mjekët që t’i rivendosin pulsin. Sidoqoftë, gjithçka ishte e kotë dhe Lisa Marie Presley vdiq në spital.
Nëna e Lisa Marie, Priscilla Presley, konfirmoi lajmin për vdekjen e saj në një deklaratë për shtyp.
“Me zemër të rëndë më duhet të ndaj lajmin e hidhur që vajza ime e bukur, Lisa Marie, na la. Ajo ishte gruaja më pasionante, më e fortë dhe e dashur që kam njohur ndonjëherë. Ne kërkojmë privatësi ndërsa përpiqemi të përballemi me këtë humbje të vështirë. Faleminderit për dashurinë dhe lutjet tuaja. Nuk do të ketë komente të tjera për momentin“, tha Priscilla.
Lisa ishte në Golden Globe Awards të martën.
Lisa Marie Presley ka lindur në vitin 1968 dhe zotëron rezidencën e babait të saj Graceland në Memphis, një atraksion popullor turistik. Ajo ishte nëntë vjeç kur Elvis vdiq nga arresti kardiak në Graceland në 1977, në moshën 42-vjeçare. /tesheshi.com/
