Lou Ottens, një inxhinier hollandez që shpiku audiokasetat e famshme, me të cilat u rritën breza të tërë rinorë duke dëgjuar muzikë, vdiq në moshën 94 vjeç, njoftoi BBC.
Vlerësohet se më shumë se 100 miliard audiokaseta janë shitur në të gjithë botën që nga shpikja e viteve 1960.
Shpikja e Ottens ndryshoi mënyrën se si njerëzit dëgjonin muzikë, ndërkohë që vitet e fundit është vërejtur kthimi i tyre në treg, ndoshta dhe për nostalgji.
Inxhinieri vdiq në shtëpinë e tij në Duisel fundjavën e kaluar, njoftoi familja e tij. Ottens u bë kreu i departamentit të zhvillimit të produkteve të Philips në 1960 dhe ekipi i tij projektoi audiokaseta pikërisht në këtë kompani. Produkti u prezantua në Panairin e Elektronikës së Radios në Berlin në 1963 dhe shumë shpejt siguroi famë botërore.
Ottens patentoi modelin me Philips dhe Sony, pasi një numër i kompanive japoneze filluan të prodhonin kaseta në madhësi të ndryshme. Në 50-vjetorin e prezantimit të kasetave, ai i tha revistës Time se produkti kishte qenë një sensacion i vërtetë që nga dita e parë.
Ndërkohë, kasetat kanë filluar papritur të kthehen në modë vitet e fundit dhe shumë muzikantë, përfshirë Lady Gaga dhe The Killers, kanë lëshuar muzikën e tyre pikërisht në kaseta.
Në Mbretërinë e Bashkuar, shitjet e kasetave në gjysmën e parë të vitit 2020 u rritën me 103 përqind krahasuar me të njëjtën periudhë të vitit të kaluar, ndërsa dhe në SHBA, shitjet e kasetave audio u rritën me 23 përqind në 2018 në krahasim me vitin e kaluar. /tesheshi.com/
