Parlamenti i Kosovës nuk do të mblidhet të mërkurën për të zgjedhur kreun e ri të shtetit.
Siç mësohet, po zhvillohen negociata me diplomatët kryesorë në Prishtinë për të gjetur një zgjidhje ku të bëhet faktor edhe AAK-ja, aq më shumë që Ramush Haradinaj nuk është më deputet.
Xhavit Haliti, nënkryetar i Kuvendit të Kosovës dhe anëtar i kryesisë së Partisë Demokratike të Kosovës (PDK) tha se ende nuk ka ndonjë datë se kur do të zhvillohet seanca për zgjedhjen e presidentit të ri.
Ndërkombëtarët pritet të nisin negociatat dhe më pas do të nisë seanca.
“Besoj që gjatë kësaj jave do të marrin vendimet e tyre grupet parlamentare dhe kandidaturat do të konkurrojnë në administratën e Kuvendit, do të paraqiten kandidaturat. Kryesia do t’i shqyrtojë kandidaturat, a janë bërë në mënyrë të rregullt dhe pastaj do të thirret seanca. Eventualisht nëse ka kërkesë për seancë të jashtëzakonshme, ju e dini se duhen 40 nënshkrime për seancë të jashtëzakonshme dhe ajo mund të mbahet në kohën kur e kërkon kërkuesi për mbajtjen e seancës”, tha Haliti.
E mërkura është dita për të cilën është raportuar si ditë seance për presidentin, por Haliti nuk e konfirmon një gjë të tillë.
Ai thotë se nuk ka ndonjë informatë, që të mërkurën mund të mbahet seanca për zgjedhjen e presidentit.
Nëse presidenti i Kosovës nuk zgjidhet deri më 7 mars, atëherë Kuvendi shpërndahet dhe vendi shkon në zgjedhje të parakohshme. /tesheshi.com/
