Evakuimi i civilëve dhe kryengritësve në lindje të Halepit nuk ka nisur ende. Sipas një marrëveshjeje të një dite më parë, këtë të mërkurë do të fillonte evakuimi, por ende është e paqartë arsyeja e shtyrjes së tij.
Observatori Sirian për të Drejtat e Njeriut njoftoi se gjer në orët e para të mëngjesit nuk e ka lënë qytetin asnjë civil apo kryengritës.
Al Jazeera citon një gazetar në terren, Zouhir Al Shimale, të raportojë për rrugë thuajse të boshatisura këtë mëngjes në Halep.
“Nuk ka lëvizje jashtë tani. Asnjë nuk është larguar ende,” ka rrëfyer gazetari.
Ndërkaq, sipas së përditshmes turke Sabah, një zyrtar i opozitës siriane ka deklaruar se evakuimin po e pengojnë milicitë shiite pro Esadit. Orient TV, në anën tjetër, thotë se evakuimi mund të shtyhet gjer të enjten.
BBC-ja e lidh shtyrjen e largimit të civilëve dhe kryengritësve me një kërkesë të qeverisë siriane, që do evakuimin e menjëhershëm të civilëve dhe të luftëtarëve të saj të plagosur nga qytezat pranë e që janë të rrethuara nga forcat opozitare.
Dje u deklarua një armëpushim midis forcave qeveritare dhe atyre kryengritëse, ndërsa marrëveshja për evakuimin, e arritur me ndërmjetësimin e Turqisë dhe Rusisë, parashikonte largimin që nga e mërkura të civilëve dhe kryengritësve nga pjesa lindore e Halepit. /tesheshi.com/
