Kosova vijon të ketë lidhje emocionale, politike dhe ekonomike me vendin që 20 vjet më parë drejtoi ndërhyrjen perëndimore në luftën e saj me ish-Federatën Jugosllave, e që solli edhe shpalljen e pavarësisë së Kosovës. Kështu e nis artikullin “The Guardian” në një foto-ese për të treguar edhe vizualisht këto lidhje. Sipas gazetës, ka sondazhe që sugjerojnë se Kosova mban nivelin më të alrtë të miratimit për lidershipin amerikan sesa çdo vend tjetër. Më poshtë janë fotografitë e gazetës me përshkrimet përkatëse.
Në vitet 1990, presidenti i parë i Kosovës, Ibrahim Rugova e mbyllte konferencën për mediat, çdo të premte me fjalët: “Zoti e bekoftë Amerikën dhe miqtë tanë perëndimorë”. Fraza zuri në publik dhe ndjesia vetëm sa u bë më e fortë kur Bill Klinton urdhëroi NATO-n të bombardonte shënjestrat serbe gjatë luftës së Kosovës në vitin 1999.
Në ditët e sotme, është e vështirë të gjesh ndonjë shenjë fizike të luftës. Një brez i ri është rritur në mjedisin e paqes dhe të stabilitetit relativ. Sidoqoftë, ndjesia pro-amerikane është ende e pranishme.
Një nga rrugët kryesore në kryeqytetin Prishtinë mban emrin e Bill Klintonit, ish-presidentit amerikan në kohën e luftës. Rrugë të tjera, sikundër shkolla dhe qendra sportive, jaën emërtuar me emrin e ish-sekretares amerikane të Shtetit, Madlin ollbrajt, kongresmenit Eliot Engel, ish-presidentit Xhorxh Bush dhe liderëve të tjerë të vendeve anëtare të NATO-s, përfshirë edhe kryeministrin britanik, Toni Bler, për të cilin Kosova ka dobësi të veçantë.
Çdo 4 korrik, në ditën e Pavarësisë së Shteteve të Bashkuara, zjarrfikësit në Prishtinë pastrojnë statujën e Bill Klintonit në një shesh qendror dhe zëvendësojnë flamurin amerikan që valëvitet pranë. Ceremonia organizohet nga Shoqata e miqve të Amerikës në Kosovë dhe përcillet nga zyrtarë publikë e ushtarakë dhe përfaqësues të ambasadës amerikane.
Ka po ashtu një tur të përvitshëm basketbolli për fëmijë quajtur “Falemnderit SHBA” për të shënuar ditën e Pavarësisë.
Trupat amerikane kanë qenë të pranishme në Kosovë që prej vitit 1999 si pjesë e misionit paqeruajtës të NATO-s. Sot ndodhen rreth 600-700 ushtarë të NATO-s në territorin e Kosovës.
Kryebashkiaku i Llashticës, qytet në juglindje të Kosovës, është një fans i madh i Amerikës dhe ka investuar me mijëra euro gjatë viteve të fundit për dekorimin e qytetit me yje dhe viza e postera që i referohen momenteve kyçe të zhvillimit të luftës.
Kompleksi i argëtimit Vali në Perlepnicë, pranë qytetit të Gjilanit, kërkon të krijojë element të Perëndimit amerikan dhe kulturës amerikane.
Ka mjaft qendra qitjeje në Kosovë, shumë prej të cilave janë hapur nga shteti pas luftës. Ato shërbejnë po ashtu si një mënyrë për të kontrolluar pronësinë e armëve në Kosovë.
Në të gjithë Kosovën ka shumë shtëpi private, restorante, hotele apo ndërtesa publike që janë ndërtuar si imitacione të Shtëpisë së Bardhë.
Diaspora në Shtetet e Bashkuara
Shumë kosovarë jetojnë në Shtetet e Bashkuara, që prej kohësh së bashku me Gjermaninë dhe Zvicrën kanë qenë destinacionet kryesore për refugjatët kosovarë në vitet 1990. Disa prej tyre, si Qamil Brahimi, i cili u largua për një jetë të re në Nju Jork gjatë luftës, kanë prona në Kosovë ku kthehen gjatë pushimeve.
Babai i Eddie Steven, Rox, arriti në SHBA në vitet 1990 si refugjat dhe nisi një jetë të re me një grua amerikane. Ai ndërtoi resortin “California” në periferitë e Prishtinës dhe çdo verë familja kthehet për të shijuar parkun.
Përsa kohë nuk ka ndryshime madhore në politikën amerikane ndaj Kosovës, nuk ka arsye të besohet se mund të zbehet devocioni i këtij vendi. Yjet dhe rripat do të vijojnë të ngrihen në Prishtinë çdo 4 Korrik.
Përgatiti: Juli Prifti – /tesheshi.com/
