Shtëpia e Bardhë tha se pesë vende të tjera janë shumë afër nënshkrimit të një marrëveshje mbi normalizimin e marrëdhënieve me Izraelin, duke përfshirë tre vende të Lindjes së Mesme.
Shefi i stafit të presidentit amerikan Donald Trump, Mark Meadows u tha gazetarëve në Wisconsin se ishte jashtëzakonisht e rëndësishme që marrëdhëniet izraelite me Emiratet e Bashkuara Arabe dhe Bahreinin të normalizoheshin.
“Pesë vende të tjera po konsiderojnë seriozisht normalizimin e marrëdhënieve me Izraelin dhe midis tyre janë tre vende nga rajoni,” tha Meadows, por nuk tregoi se cilat vende ishin të përfshira.
Reagime të mprehta
Paralelisht, Meadows tha se Trump nuk do të udhëtonte në New York të martën, por do t’i drejtohej Asamblesë së Përgjithshme të Kombeve të Bashkuara nga Shtëpia e Bardhë.
Sesioni i Asamblesë së Përgjithshme do të mbahet kryesisht në formatin online për shkak të pandemisë COVID-19.
Marrëveshjet për normalizimin e marrëdhënieve midis Izraelit dhe Emirateve të Bashkuara Arabe si dhe Bahreinit, u nënshkruan të martën në Shtëpinë e Bardhë .
Kjo provokoi reagime të mprehta nga udhëheqësit palestinezë dhe disa shtete arabe, të cilat e quajtën “tradhëti” këtë akt nga Emiratet dhe Bahreini. /tesheshi.com/
