Ishte mëngjesi i 25 korrikut kur Enver Zymberi së bashku me shumë kolegë të Njësisë Speciale të policisë së Kosovës ia kishin mësyrë veriut, pasi kishin marrë urdhrin për t’i marrë nën kontroll dy pika kufitare me Serbinë.
Sundimi i ligjit në gjithë territorin e Kosovës, i kushtoi me jetë policit Zymberi, i cili u qëllua me snajper gjersa ishte në makinën e pablinduar të policisë.
Por, misioni i sundimit të ligjit, përkushtimi ndaj tij dhe trimëria, pas vdekjes i shërbyen Enver Zymberit për t’iu dhënë titulli ‘Hero i Kosovës’ nga ish-presidentja kosovare, Atifete Jahjaga.
“Për trimërinë dhe përkushtimin e treguar deri në flijim për vendosjen e sundimit të ligjit në tërë territorin e Republikës së Kosovës”, ka qenë motivi i kurorëzimit të heroizmit të policit Enver Zymberi.
Jarinja e Bërnjaku, kanë qenë dy pikat e synuara të policisë së Kosovës në aksionin e 25 korrikut, e që hasi në një rezistencë të armatosur të serbëve të Kosovës.
Ndërkohë, tani pikat kufitare në Jarinjë dhe Bërnjak janë nën kontroll të Policisë së Kosovës, e cila gjë nuk kishte qenë e mundur kohë më parë.
Shtatë vjet pas presidenti Hashim Thaçi ka përkujtuar heroin Enver Zymberi, për çka vlerëson se në korrik të vitit 2011 i është dhënë fund idesë së Serbisë për ndarjen e Kosovës.
“Sot e kujtojmë heroin e Kosovës së lirë, Enver Zymberin, i cili ra heroikisht duke mbrojtur integritetin dhe sovranitetit e vendit tonë. Në korrikun e vitit 2011 i kemi dhënë fund idesë së Serbisë për ndarjen e Kosovës”, shkruan Thaçi në Facebook.
Ai tutje ka thënë se përkushtimi i Zymberit për mbrojtjen e rendit dhe ligjit, si dhe sakrifica e tij për mbrojtjen e kufijve të Republikës së Kosovës, do të kujtohen përherë me nderimet më të larta institucionale.
Heroin Zymberi e ka përkujtuar edhe kryeministri Ramush Haradinaj, duke thënë se rënia e tij dëshmon se themelet e Kosovës janë të forta. /tesheshi.com/
