Një shqiptar i Kosovës është arrestuar në afërsi të Kurshumlisë në Serbi me akuzën se në fshatin Kosaniçka Raça, afër Merdarit, ka shkaktuar dy zjarrëvënie.
Zëdhënësi i policisë së Kosovës, Baki Kelani, ka thënë se nuk kanë asnjë informacion për këtë arrestim, ndërsa nuk bëhet i ditur emri i personit.
“Serbët zakonisht i dërgojnë lajmet nëpërmjet ndërkombëtarëve, por nëse ne sigurojmë informacione do t’i publikojmë”, ka thënë Kelani për Koha.net.
Siç kanë thënë banorë të këtij fshati për “srpski telegraf”, zjarri i parë ka ndodhur në një shtëpi të pabanuar në rrugën Merdar- Kurshumli e më pas edhe në objektin ndihmës në të cilin është djegur një sasi e madhe sane.
“Zjarret, siç kemi marrë vesh nga Policia, i ka shkaktuar shqiptari nga Kosova i cili të shtunën në mbrëmje e ka kaluar ilegalisht kufirin në Merdar”, ka thënë për këtë portal serb këshilltari komunal i Kurshumlisë, Goran Bojoviç.
Sipas kësaj medieje, policia e ka zënë dhe e ka arrestuar autorin e zjarreve, shqiptarin, i cili, thuhet, ka pranuar t’i ketë vënë zjarret.
Edhe pse policia nuk ka dhënë detaje rreth këtij arrestimi, jo zyrtarisht thuhet se i arrestuari do të merret sot në pyetje në prani të përthyesit, pasi ai nuk e di gjuhën serbe. /tesheshi.com/
