Edhe pak ditë e mbushet viti kur Bashkimi Evropian vendosi barrikadën për ndarjen e Mitrovicës. Por me vendosjen e kësaj barrikade, BE-ja po e mbështet Serbinë në planet e saj për spastrimin etnik, kolonizimin dhe ndarjen e veriut të Kosovës.
Këtë qëndrim mbajti Bujar Voca, udhëheqës i “Iniciativës Qytetare për Veprim, (IQV), si dhe organizator i një proteste të mbajtur së fundi tek Ura e Ibrit.
Sipas tij, BE-ja po e përdor Kosovën si karotë për integrimin e Serbisë në BE, në vend që të kushtëzojë Serbinë me heqjen dorë nga Kosova.
“Serbia nuk po heq dorë nga shkatërrimi i Kosovës, dhe veprimet e saj po e zhbëjnë Republikën e Kosovës nga brenda”, ka thënë Voca.
Ai ka shtuar se Serbia dhe strukturat paralele të saj vetëm gjatë vitit 2000, nga veriu, me dhunë kanë dëbuar për në jug mbi 1500 familje me mbi 11 mijë anëtarë; ndërsa nga ana tjetër, qeveria e Kosovës as që e ka në plan t’i kthejë shqiptarë në trojet dhe shtëpitë e tyre në veri të Mitrovicës dhe Kosovës.
Por mbi të gjitha, Voca shprehet se Serbia parasheh dhe ka plan që të bëjë kolonizimin e Kosovës me serbë të ardhur nga Kroacia dhe Bosnja.
“Serbia ka paralajmëruar se do të ndërtojë 10 lagje të reja në veriun e Kosovës duke bërë të mundur që në to të vendosë rreth 15 mijë serbë nga Bosnja dhe Kroacia, dhe kjo paraqet planin përfundimtar të Serbisë mbi ndarjen e Kosovës”, ka thënë Voca dhe ka shtuar se këto kolonë që do të vijnë në Kosovë janë kriminelë serbë që kanë kryer krime në Kroaci dhe Bosnjë gjatë luftrave të zhvilluara atje”.
IQV-ja kërkon nga qeveria e Kosovës që të ndajë çdo vit nga 5 milion euro për investime ne veri ku mbi 400 shtëpi të shqiptarëve ende qëndrojnë të djegura dhe të shkatërruara gjatë luftës; si dhe të kërkojnë lirimin e mbi 500 banesave të shqiptarëve që janë të uzurpuara nga serbët në veriun e Mitrovicës dhe Kosovës.
Por nga ana tjetër, IQV-ja, kryeministrin e Kosovës Isa Mustafa e ka quajtur frikacak dhe bashkëpunëtor të regjimit të kaluar Jugosllav, ndërsa kryetarin aktual të Mitrovicës e ka quajtur gënjeshtar.
“Isa Mustafa është frikacak përball Serbisë, sepse ai ka qenë edhe bashkëpunëtor i Rrahman Morinës (ish-udhëheqës i Krahinës në Socialiste të Kosovës dhe bashkëpunëtor i afërt i Sllobodan Millosheviqit); e kjo qeveri nuk ka në agjendën e saj kthimin e shqiptarëve në veri”, ka thënë Voca.
Ndërsa Gonxhe Çaushi, ka thënë se kryetar i Mitrovicës, Agim Bahtiri vetëm na ka gënjyer disa herë se do të largojë barrikadën mbi Ibër, por një gjë e tillë nuk po ndodh.
Por ndërsa udhëheqës të IQV-së po iu drejtohen mediave, pati dhe reagime nga qytetarë të ndryshëm duke i quajtur ata si të përcaktuar politikisht.
“Ju po mbroni vetëm PDK-në, e ajo është fajtorja kryesore për këtë gjendje”, ka thënë Eroll Runiku, banor i veriut të Mitrovicës.
Ndërsa Shemsedin Miftari, një protestues tjetër, ka theksuar se nuk nuk ndihej i kënaqur me organizimin e protestës, pasi sipas tij në deklarimet e tyre po vërehej përcaktim partiak i PDK-së.
“Ne qytetarët e veriut nuk kemi nevojë për parti politike dhe tubime partiake, ne kemi nevojë për të parë dorën e shtetit”, ka thënë Miftari.
“Unë përkrahi çdo tubim e proteste të qytetarëve, por që ato duhet të jenë të arsyeshme. E në këtë rast vërehet qartë se PDK-ja qëndron mbrapa IQV-së, udhëheqësit e saj janë anëtarë të PDK-së”, ka thënë kryetar i Komunës së Mitrovicës, Agim Bahtiri për portalin tesheshi.com.
Bahtiri ka shtuar se “Mitrovica dhe veriu i Kosovës ka ardhur në këtë gjendje nga mosbërja e punëve dhe keqpërdorimet e mëdha që i kanë bërë udhëheqësit e PDK-së dhe këtë duhet ta dinë edhe këta anëtar të PDK-së që kanë protestuar sot.”
Kështu pra, shqiptarët dolën të protestojnë kundër politikave ogurzeza serbe në veri, por përfunduan duke u kacafytur mes vedi për punë partish. /tesheshi.com/
