Një takim të shtunën i ministrave të Jashtëm të Ligës Arabe për të diskutuar mbi një iniciativë franceze për paqen në Lindjen e Mesme është shoqëruar nga fjalët e ashpra të drejtuesit të këtij organizmi karshi Izraelit.
Në fjalën e tij në Kajro para ministrave, Nebil el-Arabiu ka thënë se Izraeli “është bërë vërtet sot bastioni i fundit në botë i fashizmit, i kolonializmit dhe diskriminimit racial”.
Më tej, ministrat e Jashtëm të Ligës Arabe kanë miratuar në takim një rezolutë që i mbështet si iniciativën franceze, po ashtu dhe përpjekjet arabe e ndërkombëtare për bisedime paqeje mes Izraelit dhe Palestinës.
Presidenti i Autoritetit Palestinez, Mahmud Abbas, e ka akuzuar Izraelin për zvarritje të bisedimeve.
“U përpoqëm fort me qeverinë izraelite për t’i vënë në zbatim traktatet e nënshkruara dhe për t’i respektuar angazhimet tona dhe të tyret, por ata refuzuan,” ka deklaruar ai.
Mahmud Abbas nuk e ka pranuar ofertën izraelite për bisedime të drejtpërdrejta, duke parapëlqyer iniciativën franceze, siç kanë bërë më herët gjatë kësaj jave dhe zyrtarë të tjerë palestinezë.
Sipas kësaj iniciative, të shpjeguar dhe nga kryeministri francez në vizitën e para ditëve në Izrael dhe në territoret palestineze, më 3 qershor parashikohet një takim i ministrave të Jashtëm të një numri vendesh, por pa praninë e izraelitëve dhe palestinezëve. Për t’u pasuar nga një konferencë në vjeshtë dhe me pjesëmarrjen e tyre.
Synimi është rinisja e negociatave mes izraelitëve dhe palestinezëve, pasi ato janë në vendnumëro që prej prillit të 2014-ës, kur dhe dështoi një tjetër iniciativë. /tesheshi.com/
