Nga Mensur Krasniqi
Është apo nuk është të martën Fitër Bajrami?! Kjo ishte dilema e cila gjatë gjithë së hënës mundoi shqiptarët muslimanë ndërmjet vedi në Maqedoni. I gjithë ky konfuzion i tyre ka lindur pasiqë nga vendet arabe kanë dalë me informatë zyrtare se tek ata, Fitër Bajrami është të mërkurën dhe jo të martën, pra sot. Dhe, në mënyrë që qytetarët ta kenë më të qartë se si bëhet përllogaritja e ndryshimit të muajve dhe nëse duhet të vazhdojnë agjërimin edhe sot apo të festojnë Bajramin, hoxhë i njohur i Shkupit, Bekir Halimi, ka dalë me një videoinçizim për të sqaruar komunitetin e besimtarëve të përfshirë në konfuzion e paqartësi.
Si rregull islamim sipas hoxhë Bekirit, është që fillimi dhe mbarimi i muajit llogaritet me daljen e hënës së re, si përshembull muaji i Ramazanit fillon kur shihet hëna, ndërsa mbaron si muaj dhe është Bajram atëherë kur shihet hëna e re e muajit Sheval me syrin e njeriut. Por varianti tjetër është përllogaritja astronomike e takvimit(kalendarit islam), që sipas tij Bekirit është më e saktë.
“Në shtetet të cilat e kanë marrë si bazë kalkulimin astronomik për fillimin dhe mbarimin e Ramazanit, ata pretendojnë se mënyra më e saktë, apo që disa herë ju ka dalë më e saktë, thonë që mënyra astronomike duhet të shërbejë si bazë, e pastaj të shikohet me sy dalja e hënës. Po në qoftë se këto dy lloje të kalkulimit bien në kundërshtim njëra me tjetrën, atëherë kalkulimi astronomik duhet të merret për bazë, ndërsa shikimi i hënës me sy si sekondar”, ka thënë hoxhë Bekir Halimi.
Ky debat akademik sipas tij ishte shkak që para një muaji të bëhet një konferencë e madhe në Turqi mbi unifikimin e takvimit (kalendarit islam).
“Pas kësaj, të gjitha ato shtete të cilat kanë një bashkësi islame e cila merret me organizimin e jetës fetare, e kanë për obligim dhe detyrë që të përcaktojnë datat e kalendarit islam (fillimin e Ramazanit, përfundimin e tij, si dhe dhe dy Bajramet); dhe nëse ata dalin me deklarata dhe qëndrime zyrtare për data të caktuara, muslimanëve i’u ngelet obligim për të respektuar këto përcaktime. Obligimi i muslimanëve të atij vendi ndaj institucionit përkatës nuk nënkupton një nënshtrim të verbër ndaj tyre, por pasi që është obligim fetar dhe kjo ka bazë fetare me argumente fetare.”
Hoxhë Bekir Halimi në fund të sqarimit të tij ka përmendur një hadith të profetit Muhamed a.s. ku thuhet “Agjërohet kur agjërojnë muslimanët, bëhet Fitër Bajram kur bëjnë muslimanët dhe bëhet Kurban Bajram kur bëjnë muslimanët”.
Me këtë, kuptimi i hadithit është se agjërimi dhe Bajrami bëhen me xhematin, komunitetin dhe shumicën e njerëzve ku jetoni.
Megjithatë, nëpër rrjetet sociale të facebookot vërehen komente të ndryshme që nuk i shërbejnë solidarizimit dhe bashkimit të muslimanëve ndërmjet tyre, që do të thotë se dikush do të festojë sot Bajramin, ndërsa të tjerët do të marrin si bazë kalkulimin kalendarik të arabëve dhe do vazhdojnë agjërimin edhe një tjetër ditë. Për kategorinë e dytë, dita e parë e Fitër Bajramit mbetet e mërkura.
Mirëpo fatmirësisht, Fitër Bajrami zgjat ditë, kështu që musliman, nëse jo ditën e parë, atëherë në të dytën do të bashkohen për t’i uruar njëri-tjetrit këtë festë të madhe në besimin e tyre. /teshesh.com/
