Sot, para qeverisë së Kosovës kanë protestuar familjarët e personave të përfshirë në konfliktin e fundit në Kumanovë. Në këtë protestë ishin diku rreth 500-600 persona të cilët kërkuan nga institucionet e vendit, lirimin e djemve të tyre që po mbahen në burgjet e Maqedonisë.
Protestuesit mbanin në duar flamuj kombëtar dhe pankarta si: ‘Të lirohen djemtë tanë’, ‘Djemtë tanë janë çlirimtarë’, ‘Të mbrohet dinjiteti i vëllezërve në Maqedoni’, etj.
Në protestë kanë marrë pjesë edhe ish-pjesëtarë të UÇK-së, deputetë, bashkëluftëtarë të disa prej të arrestuarve në Maqedoni, qytetarë, etj.
I pari masës së mbledhur iu drejtua z. Taulant Gashi, familjar i njërit prej të arrestuarve në Maqedoni. Ai kërkoi nga institucionet e Kosovës që të zbardhin incidentin në Kumanovë, që të bëjnë presion lidhur me trajtimin jonjerëzor të shtetit maqedonas ndaj të burgosurve si dhe në identifikimin e viktimave. Ai po ashtu zbrazi revoltën ndaj deklaratave të disa udhëheqësve tanë, të cilët të përfshirëve në këtë incident, i kishin quajtur terroristë.
Ndërkaq, Xhavit Jashari, përfaqësues i organizatave të dala nga lufta, tha se ata që ranë në betejën e Kumanovës janë dëshmorë. Ai kërkoi nga institucionet e vendit të jenë të matur në deklaratat e tyre.
Në fund këshilli organizativ i protestës shpalosi katër kërkesat e tyre drejtuar institucioneve të vendit:
Kërkojmë urgjentisht nga institucionet e Kosovës që sa më shpejt të ndërmarrin veprime konkrete në mbrojtje të qytetarëve të vet që janë të arrestuar e që po torturohen nga regjimi sllavo-maqedonas dhe servilët shqiptarë në institucione.
Kërkojmë urgjentisht që Qeveria e Kosovës të ndërmarrë veprimet konkrete në identifikimin dhe sjelljen e trupave që ranë dëshmorë për liri dhe drejtësi të shqiptarëve në Maqedoni.
Ne protestojmë në shenjë revolte ndaj institucioneve tona, të cilat për më shumë se një javë qëndrojnë indiferentë ndaj qytetarëve të vet, të cilët vriten, rrahen, e torturohen nga regjimi policor e diktatorial i Maqedonisë.
Ne protestojmë në shenjë revolte ndaj deklarimeve të udhëheqësve të institucioneve të Kosovës, që i quan terrorist ish luftëtarët e lirisë. Ata djem nuk kursyen asgjë nga vetja për lirinë e shqiptarëve në Kosovë, Luginë të Preshevës e Maqedoni./tesheshi.com
