Kombëtarja shqiptare ka rrëmbyer 1 pikë të artë nga udhëtimi i vështirë në Kopenhagen, pasi u ndesh me përfaqësuesen daneze, rivalit direkt për vendin e dytë. Ishte një ndeshje tejet e vështirë për djemtë e De Biasit, duke patur parasysh presionin e madh të kundërshtarit që nga minuta e parë.
Mund të konsiderohet heroik marrja e këtij barazimi përballë një ekipi relativisht të fortë, por kuqezinjtë nuk bindën. Gjykuar nga statistikat, sidomos nga e dhëna e rasteve, kjo mund të konsiderohet si ndeshja më e dobët e kombëtares shqiptare deri më tani, në kuadër të takimeve në grup.
I vetmi rast qe ai i minutës së fundit, ndoshta më i pastërti i gjithë lojës, ku ne dhe mund të kishim bërë historinë duke dalë me tre pikë, por Odise Rroshi nuk e prishi traditën shqiptare për të qenë gjithsesi të pafat në paaftësinë tipike për të përfituar nga fati.
Me këtë barazim skuadra shqiptare ngjitet në kuotën e 11-pikëve, aq sa ka Danimarka, por Shqipëria ka një ndeshje më pak.
Tashmë pritet takimi i rradhës, ai i së hënës me Portugalinë në “Elbasan-Arena”. Të shohim nëse shqiponjat do ngjiten sërish lart në qiejt e suprizave. /tesheshi.com/
