Nga Miradie Hasani
Ndryshimet në ligjin për gjuhët ishte pika e parë e Deklaratës së Përbashkët të partive shqiptare, dhe u tha se ato do të bëhen sapo të konstituohet Kuvendi. Madje disa politikanë shqiptarë thonin se ndryshimet në ligjin për gjuhët do të votohen, edhe para se të votohet qeveria.
Deputeti i BDI-së Xhevat Ademi është shprehur se të gjitha pikat e Deklaratës së partive politike shqiptare janë përfshirë në programin qeverisës të Zoran Zaevit.
Sipas tij, Deklarata do të realizohet shkronjë për shkronjë. Një prej prioriteteve të nivelit më të lartë të qeverisë së re është gjuha shqipe.
“Deklarata e përbashkët e partive politike shqiptare që në këtë konstelacion forcash, duke pas parasysh edhe numrat, mund të realizohet germë për germe dhe është e përfshirë në programin e qeverisë. Duke filluar nga rishikimi i proceseve për të cilat çdo shqiptarë ka dilemat si procese të montuara e deri te implementimi i germës së fundit të Marrëveshjes së Ohrit. Një prej prioriteteve të nivelit më të lartë të qeverisë së re është propozimi i ligjit të ri për përdorimin zyrtarë të gjuhës shqipe dhe ajo është pjesë e programit të qeverisë së re”, u shpreh Xhevat Ademi, Deputet i BDI-së.
Por deputetja e LSDM-së, Frosina Remenski mohon të kenë diskutuar shumica parlamentare për ndryshimet ligjore në ligjin për gjuhët.
“Jo, jo aspak, për ligjin për gjuhët nuk kemi diskutuar aspak”, tha Remenski.
Ndërsa deputeti i Lëvizja Besa, Fadil Zendeli thotë se grupi i tij parlamentar ka gati propozimin për ndryshimet në këtë ligj, por fillimisht duhet parë se çka ofron shumica parlamentare.
“Thjesht, ata si shumicë që janë në Kuvend, edhe në qeverisje, ata duhet të ofrojnë versionin e tyre dhe ta dorëzojnë në procedura parlamentare. Ne si grup parlamentar kemi alternativën tonë rreth ligjit për përdorimin zyrtar të gjuhës shqipe, dhe në momentin e duhur ne do të dalim me propozimet tona. Të shohim se çka ka qeveria në këtë drejtim”, tha Zendeli.
Zyrtarizimi i gjuhës shqipe zuri vend të rëndësishëm në fushatat e partive shqiptare, ndërsa LSDM-ja premtoi avancim të përdorimit të shqipes në institucione.
VMRO DPMNE zhvilloi fushatë të ashpër kundër zyrtarizimit të shqipes në tërë Maqedoninë, ndërsa partitë shqiptare e refuzuan draft-ligjin e LSDM-së dhe bënë të vetin.
BDI paralajmëroi se pas ndryshimeve në ligjin për gjuhë do të formohet edhe një organ mbikëqyrës, që do të sigurojë përdorim të drejtë të shqipes.
Avancimi i përdorimit të gjuhës shqipe ishte top-temë edhe në zgjedhjet e kaluara parlamentare për BDI-në, por kjo parti vendosi që pas formimit të qeverisë prioritet numër 1 ta ketë integrimin në NATO. /tesheshi.com/
