Përfaqësuesja e Shqipërisë do të luajë më 6 tetor ndaj Spanjës, një ndeshje në fushë kundërshtare dhe e vlefshme për grupin G të eliminatoreve europiane për Botërorin 2016. Një takim të cilin kuqezinjtë mund ta luajnë në kontinentin afrikan.
Dhe ja përse. E përditshmja AS bën të ditur se presidenti i qytetit autonom spanjoll të Meliljes në Afrikën e Veriut, Juan Jose Imbroda, i ka bërë kërkesë zyrtare Federatës Spanjolle të Futbollit që ndeshja mes Spanjës dhe Shqipërisë në tetor të luhet në eksklavën afrikanoveriore.
Siç u ka deklaruar gazetarëve presidenti i këtij qyteti autonom, në kërkesën e tij është përcjellë aspirata e vjetër e këtij territori spanjoll për të qenë pritëse e një ndeshjeje të përfaqësueses së Spanjës.
“Do të qe lajm i mrekullueshëm për Meliljen që ekipi kombëtar spanjoll të luante këtu,” ka thënë Imbroda, i bindur se ka një mundësi të mirë që qyteti të zgjidhet për organizimin e ndeshjes mes Spanjës dhe Shqipërisë.
Stadiumi më i madh i Meliljes, “Estadio Municipal Alvarez Claro”, ka një kapacitet prej 12.000 vendesh; një terren ku luan UD Melilja, ekipi i kategorisë Segunda B në futbollin spanjoll. /tesheshi.com/
