“Jam krenar për lojtarët e mi dhe për vendin. Ia dolëm të rivalizojmë kundër tre përfaqësueseve të mëdha. Mbeta shumë orë pa gjumë duke menduar për këtë turne, por luajtëm në nivel të lartë. Duhet të mësohemi të luajmë në turne si ky,” citon faqja zyrtare e UEFA-s deklaratën e trajnerit Silvinjo pas ndeshjes të së hënës.
Më konkret ishte Gjimshiti në reagimin pas humbjes. Kapiteni tha se, “Nuk ishte ndeshje e lehtë. Spanja ushtroi shumë presion mbi ne; ata luajtën futboll të bukur dhe kishin më shumë raste se ne në pjesën e parë. Luajtëm më mirë në pjesën e dytë dhe kishim raste, kështu që do të thoja se meritonim më së paku një barazim në këtë ndeshje.”
Mund të veçohet si mjaft interesant dhe komenti i raportuesit të Spanjës për UEFA-n, Graham Hunter, që do të shkruante në një nga dy fjalitë e tij: “Në një mbrëmje të mrekullueshme futbolli, Shqipëria më bëri tifoz!”
Fuqinë e rivalit të Shqipërisë e ilustrojnë dy të dhëna domethënëse: kjo ishte hera e dytë që Spanja i fitonte të tre ndeshjet në grup, si në 2008-tën, kur merrte dhe trofeun, dhe për herë të parë spanjollët e përfundojnë fazën në grupe në një Europian pa pësuar asnjë gol.
