Shqipëria ka nisur t’u japë leksione vendeve të tjera mbi Reformën në Drejtësi, që duhet thënë se si e tillë është një rast unikal. Kështu, siç njofton ministrja Gjonaj, janë moldavët ata që erdhën në Tiranë për ta mësuar reformën tonë të bujshme, e cila për më tepër ka çuar dhe në një krizë politike.
Dhe janë amerikanët ata që po e financojnë dhe këtë proces.
“Kënaqësi të shoh që reforma jonë në drejtësi është shndërruar në model suksesi, duke u marrë si shembull pozitiv nga shumë vende të tjera. Falë edhe mbështetjes se Ambasadës së SHBA-ve dhe OPDAT, pata kënaqësinë të mirëprisja në Ministrinë e Drejtësisë një delegacion të lartë nga Moldavia, të cilët në kuadër të reformimit të drejtësisë në vendin e tyre, kanë zgjedhur të ndjekin rrugëtimin tonë për të rindërtuar sistemin.
Më vjen mirë, që Shqipëria sot është shndërruar në pikë referimi për forcimin e shtetit të së drejtës, ku rezultatet pozitive kanë justifikuar plotësisht betejat tona për ideimin, hartimin dhe miratimin e saj duke i ofruar qytetarëve tanë një shpresë të re. Teksa bisedoja me secilin nga anëtarët e delegacionit moldav për të kuptuar më drejtpërdrejt gjendjen aktuale të tyre, kuptohej më qartë kontrasti i madh që ka shkaktuar ky proces i cili do të shënoj kthesën e duhur në luftën tonë të pandalshme kundër pandëshkueshmërisë dhe fenomenit të korrupsionit nëpër dekada”, shkruan ministrja e Drejtësisë. /tesheshi.com/
