Kryeministri Rama ka cekur dhe njëherë raportin delikat të Shqipërisë me Kosovën, duke thënë se andej e këndej kufirit nuk duhet të ekzistojnë fajësime të ndërsjellta.
“Në këndvështrimin tim dhe unë këtë e kam thënë gjithmonë, qasja jonë strategjike e shqiptarëve dhe në këtë rast flasim për Kosovën, por mendoj që kështu është edhe për Shqipërinë dhe kështu duhet të jetë për të gjithë shqiptarët, nuk është që të fajësojnë të tjerët, apo të hyjmë në lojën e fajësimit të njëri-tjetrit në sensin ‘jo shiko, dakord, ne jemi mbase këtë, po shiko ata’”, u shpreh ai, duke kaluar më pas në planin e këshillave.
“Kosova, për veten e saj duhet të tregojë ndërkombëtarisht një qenie e cila është plotësisht e vetëdijshme për barrën e flamurit që ka, për barrën e Kushtetutës që ka, për barrën e përgjegjësisë që ka, si një aktor i ri, si një anëtar i ri i bashkësisë ndërkombëtare. Nuk është Serbia etaloni dhe nuk është Serbia standardi dhe nuk është Serbia pika e referimit”, tha Rama.
Më tej, sa i takon sulmeve të vazhdueshme serbe ndaj Kosovës, përfshirë edhe ato diplomatike, Rama u shpreh se sulme të tilla mund të konsiderohen edhe si “sulme ndaj Shqipërisë”.
“Kosova nuk është vetëm, jo thjesht se ka Shqipërinë, po sepse ka aleat strategjik, që i dimë fare mirë kush janë, pa të cilin Kosova s’do të ekzistonte sot si shtet dhe me të cilët Kosova mund t’i arrijë të gjitha ato që ne të gjithë duam që Kosova t’i arrijë”, theksoi Rama. /tesheshi.com/
