Ambasadorja Yuri Kim shpërndau një “mesazh dashurie” për Shqipërinë e shqiptarët këtë mëngjes të hëne, e gjitha në kuadër të 30-vjetorit të rilidhjeve diplomatike Tiranë-Uashington.
“Është privilegj të shërbesh si diplomat amerikan kudo në botë – por më lejoni të them se Shqipëria është e veçantë.
Që nga momenti kur mbërrita, kam ndjerë ngrohtësinë e popullit shqiptar dhe lidhjen e thellë që ekziston midis dy vendeve tona. Nuk ka amerikan që viziton Shqipërinë dhe nuk e përjeton atë.
Gjatë vitit tim të parë këtu kam pasur mundësinë të udhëtoj përreth vendit tuaj të bukur dhe të përjetoj mikpritjen e famshme të popullit shqiptar. Faleminderit nga thellësia e zemrës!”, thuhet në gjysmën e parë të mesazhit të saj.
Ndërsa në pjesën e dytë të mesazhit, ajo ka një frazë të koduar; “kërcënime ndaj demokracisë”. Shkruan kështu:
“Dy vendet tona kanë shumë për të festuar së bashku. Dhe qoftë për katastrofa natyrore, COVID, apo kërcënime ndaj demokracisë, ne jemi mbështetur tek njëri-tjetri, kemi punuar së bashku për të kapërcyer sfida të panumërta, krah për krah! Kjo është një marrëdhënie që mishëron atë që do të thotë të jesh partnerë, çfarë do të thotë të jesh aleatë, çfarë do të thotë të jesh miq besnikë”.
Por me gjasë, “kërcënime ndaj demokracisë” i atribuohet sulmit ndaj Capitol-it e jo ndonjë zhvillimi shqiptar të viteve të fundit, siç ishte fjala vjen, djegia e mandateve nga opozita apo bojkoti i zgjedhjeve lokale.
Për Kim, raportet Shqipëri-SHBA i pret një marrëdhënie e shkëlqyer në vitet në vijim.
“Jam e bindur se vendet tona do të arrijnë gjëra të mëdha gjatë 30 viteve të ardhshme dhe se miqësia midis amerikanëve dhe shqiptarëve vetëm do të thellohet’, thotë ambasadorja amerikane. /tesheshi.com/
