Në kulmin e vapës, me temperatura të llojit xhehenem në mbi 40 gradë celsius, Shqipëria mbeti pa energji elektrike, ndodhur pas një blackauot-i total. Kjo ka detyruar ministren Balluku që të dalë në një konferencë të jashtëzakonshme për të sqaruar se ç’ndodhi apo ç’po ndodh.
Balluku deklaroi se kjo situatë u krijua si pasojë e një avarie në linjën e interkonjeksionit Shqipëri-Greqi, flukseve të mëdha në rrjet dhe temperaturave tepër të larta.
Ministrja shtoi se situata u normalizua në një kohë të shkurtër, por rreziku për përsëritje mbetet i lartë.
“Dua t’ju informoj për situatën kritike që jemi përballur sa i përket sistemit të transmetimit të energjisë elektrike. Duke nisur nga linja e interkonjeksionit Shqipëri-Greqi, e cila ka pasur një avari dhe më pas në efekt kaskadë i gjithë vendi, kemi pasur shkëputje të energjisë në gjithë Shqipërinë. E njëjta situatë ka ndodhur në Malin e Zi dhe Kroaci. Volumet e mëdha në sistemet e transmetimit dhe temperaturat kanë krijuar këtë avari. Nga puna e mirë që është bërë në terren kemi rikuperuar shpërndarjen e energjisë për 30 minuta. Jemi në rrezikshmëri pasi volumet e transmetimit janë të mëdha në linjat e interkonjeksionit”, tha Balluku. /tesheshi.com/
