Presidentët e dy pjesëve të ndara të Qipros, turke dhe greke, shtrënguan duart të premten mes buzëqeshjesh, duke dhënë sinjale shprese se së shpejti mund të ketë një marrëveshje që do ta ribashkonte ishullin.
Mustafa Akënxhë dhe Nikos Anastasiadis u takuan në prani të këshilltarit special të OKB-së për Qipron, Espen Barth Eide. Takimi zgjati katër orë dhe u zhvillua në zyrat e OKB-së. Nisja e bisedimeve të paqes u bë e mundur pak ditë pas zgjedhjeve presidenciale në Qipron turke, të fituara nga Mustafa Akënxhë, dhe mendohet që deri në dhjetor të ketë një zgjidhje. Por zyrtarët turq janë më optimistë, teksa deklarojnë se ka gjasa që një zgjidhje e përhershme të gjendet që në shtator. Norvegjezi Espen Barth Eide përshkroi para gazetarëve frymën e bisedimeve, duke theksuar, “Ata ndanë vizionin e tyre për një Qipro të bashkuar.”
Më herët, bisedimet patën rifilluar në shkurtin e 2013-s pas një pauze prej dy vitesh. Por ato morën një goditje pasi qipriotët grekë e lanë tryezën e negociatave kur Turqia dërgoi tetorin e shkuar në bregun jugor të Qipros greke një anije për kërkimin e hidrokarbureve. Turqia është i vetmi vend që e njeh Qipron turke, ndërsa bashkësia ndërkombëtare njeh Qipron greke, e cila është dhe anëtare e BE-së. Marrëveshja e ribashkimit do të krijonte një federatë me dy shtete, në bazë të marrëveshjeve të mëhershme.
Rifillimin e bisedimeve e përshëndeti dhe sekretari i përgjithshëm i OKB-së, Ban Ki-Moon.
Eide, i dërguari i OKB-së, bëri të ditur se dy presidentët, Akënxhë dhe Anastasiadis, do të takohen përsëri më 23 maj, për të treguar unitetin e tyre në nxitjen e përpjekjeve për të arritur një marrëveshje paqeje të pranuar reciprokisht. /tesheshi.com/
