Edhe njëherë për ata që mendojnë se flama e ikjeve, apo ajo e zhvendosjes demografike me shpopullim zonash rurale, ndodh vetëm në Shqipëri, duke u vetëkonsideruar “qendra e botës” e negativiteteve, duhet ta dijnë se dhe vende europiane vuajnë po nga këto fenomene. Nëse në Portugali po ka “ikje”, në Spanjë po ka zhvendosje të ethshme nga fshati në qytet, e këto pra në dy vende të zhvilluara.
Rosy Costoya është një grua spanjolle që e ka kthyer krizën demografike në një biznes të vërtetë.
Sipas mediave lokale, Costoya, së bashku me burrin Mark Adkinson, kanë hapur një kompani që shet shtëpi të braktisura dhe fshatra në të gjithë Spanjën, veçanërisht në rajonin e Galicisë, aty ku ajo u rrit, dhe e cila vitet e fundit po përjeton lëvizje masive të popullatës në rajone më të pasura dhe vendet e tjera evropiane.
Sipas disa raporteve, rreth 3.562 fshatra janë braktisur në rajonin e Galicisë në Spanjën veriperëndimore, ku pothuajse askush nuk jeton sot.
Costoya, duke parë krizën në këtë pjesë të Spanjës, hapi një agjenci që blen shtëpi dhe fshatra dhe ua shet ato klientëve që vijnë nga pjesë të ndryshme të botës, veçanërisht nga Britania e Madhe dhe SHBA.
Duke folur para gazetarëve, ajo tha se qëllimi i saj është që një ditë t’i mbushë këto fshatra të braktisura me banorë, veçanërisht fëmijë.
Ka një interes të madh për shtëpitë në këto fshatra, kjo është arsyeja pse ajo së fundmi iu desh të merrej me gati 200 kandidatë të interesuar për një pronë atyre anëve.
Por kur vjen puna te çmimet ka një befas: çmimet e shtëpive më të lira janë pak më shumë se 50,000 euro, ndërsa disa kushtojnë deri në 2 milion. Sepse, sido-sido, është fjala për Spanjën, famën e saj, e padyshim natyrën joshëse e tokën e pasur. /tesheshi.com/
