Gjykata e Lartë ka dhënë sot vendimin ndaj dy deputetëve demokratë të akuzuar për shpifje nga kryeministri.
Gjykata gjobiti me 200 mijë lekë të reja deputetin demokrat Edi Paloka dhe me të njëjtën shumë edhe kolegun e tij Arben Ristani, të akuzuar për shpifje në dëm të Kryeministrit Edi Rama. Vendimet u dhanë në dy seanca të ndryshme nga trupa gjyqësore.
Në dalje të gjykatës deputeti Edi Paloka tha se e kupton mirë situatën nën presion ku ndodhet Gjykata e Lartë, ndaj shtoi se nuk e vë nën akuzë.
“Siç e kemi thënë më herët ne vendimet e gjykatës i zbatojmë, qofshin konsideruar nga ne të drejta apo jo. Të them të drejtën nuk e prisja vendimin, shpresoja që Gjykata e Lartë të mos ishte pjesë e presionit”, tha Paloka.
Avokatja e Kryeministrit Edi Rama deklaroi se padia ka qenë për “Shpifje për shkaqe individuale” dhe jo për shkaqe të detyrës.
Ajo tha më tej se është e pakënaqur nga gjykimi i çështjes në themel./tesheshi.com/
