Një numër udhëheqësish botërorë kanë shprehur ngushëllimet e tyre për viktimat e shpërthimit të një nate më parë në Mançester, duke shprehur qëndrimin në krah të Britanisë.
Presidenti rus Vladimir Putin deklaroi menjëherë se ishte gati t’i jepte një shtysë bashkëpunimit me Britaninë kundër terrorit, pas asaj që ai e quajti një krim cinik, çnjerëzor.
Nga Australia, kryeministri Malcolm Turnbull tha në reagimin e tij se sulmi ishte i tmerrshëm, ngaqë dukej se kishte patur në shenjë qëllimisht adoleshentët.
Fjalët e kancelares gjermane Angela Merkel me këtë rast do të ishin këto: “Ky sulm i dyshuar terrorist veç ka për ta forcuar vendosmërinë tonë për të punuar me miqtë britanikë kundër atyre që planifikojnë dhe kryejnë akte të tilla çnjerëzore. E garantoj popullin në Britani: Gjermania qëndron në krahun tuaj!”
I tmerrshëm dhe tronditës ishte ky shpërthim, sipas presidentit francez Emmanuel Macron, që njoftoi se do të fliste drejtpëdrejt me kryeministren britanike.
“Italia bashkon forcat me qeverinë dhe popullin britanik. Mendja jonë është te viktimat e sulmit të Mançesterit dhe te familjet e tyre,” thuhet në reagimin e shefit të qeverisë italiane, Paolo Gentiloni.
Kryeministri kanadez Justin Trudeau do të shkruante në Twitter, “Kanadezët janë të tronditur nga lajmet mbi sulmin e tmerrshëm në Mançester.”
Solidaritet me britanikët ka shprehur dhe kryeministri grek Alexis Tsipras. “I shprehim solidaritetin tonë popullit britanik, e mbështetjen tonë të afërmve të viktimave. Jemi në anën tuaj!”
Mesazhe të ngjashme kanë përcjellë dhe krerë të tjerë shtetesh.
Më së paku 22 persona humbën jetën dhe dhjetëra të tjerë u plagosën mbrëmë në Mançester pas një shpërthimi në “Manchester Arena”, aty ku pak më herët ishte mbyllur koncerti i një këngëtareje amerikane. /tesheshi.com/
