Një ditë pasi kryetari i partisë më të madhe opozitare në Turqi i shpëtoi një sulmi të terroristëve të PKK-së, shpërthimi i një makine-bombë nga e njëjta dorë u ka marrë jetën tetë policëve dhe ka plagosur 45 të tjerë, dy prej të cilëve në gjendje të rëndë.
Sulmi terrorist u krye këtë mëngjes, në 06:40 me orën lokale. Një kamion i mbushur me lëndë shpërthyese u hodh në erë në Xhizre, në provincën juglindore të Shërnakut, dhe kishte si objektiv një pikë kontrolli të policisë.
Shpërthimi e dëmtoi rëndë godinën e stacionit policor, ashtu siç ka dëmtuar dhe shumë ndërtesa të tjera aty pranë.
Forcat turke të sigurisë kanë nisur një operacion në tërë zonën për kapjen e terroristëve të PKK-së që kryen sulmin.
Akti i sotëm terrorist është më i fundit në një varg shpërthimesh të ngjashme që e kanë goditur Turqinë gjatë kësaj kohe. /tesheshi.com/
