Gjashtë ushtarë jordanezë vdiqën e 14 të tjerë u plagosën këtë të martë pas shpërthimit të një makine bombë pranë kufirit me Sirinë.
“Gjashtë ushtarë kanë rënë dëshmorë dhe 14 të tjerë janë plagosur në sulmin terrorist,” ka raportuar një zyrtar për agjencinë e lajmeve AFP, duke shtuar se bëhej fjalë për të dhëna paraprake.
Televizioni shtetëror jordanez do ta përshkruante incidentin si një sulm terrorist, ndërsa ai ndodhi në el-Rukban, karshi një kampi refugjatësh, që mban rreth 70.000 njerëz.
Bëhet fjalë një sulm të koordinuar, me pjesëmarrjen e një numri makinash. Bombat shpërthyen në një zonë tampon, midis kufirit jordanez dhe kampit të refugjatëve. Përgjegjësinë për sulmin nuk e ka marrë asnjë grup.
Për shkak të ngjarjes, prej ditës së sotme territoret kufitare me Sirinë në veri dhe në verilindje të vendit janë konsideruar zona të mbyllura ushtarake.
Mbreti Abdullah tha se Jordania do të përgjigjet me grusht të hekurt ndaj çdokujt që përpiqet të dëmtojë kufijtë apo sigurinë e vendit, por nuk bëri specifikime. /tesheshi.com/
