Ambasadori i SHBA në Tiranë, Donald Lu ka shpërthyer sërish por kësaj here ka përmendur emra, jo politikanësh por kriminelësh të lidhur me politikën.
Deklarata e ambasadorit Lu është bërë gjatë një konsultimi për reformën në drejtësi.
“Javën e kaluar pyeta: kush i trembet më shumë kësaj reforme? Thashë se shumë zyrtarë të qeverisë dhe gjyqësorit i tremben asaj.
Personat e tjerë që duhet t’ia kenë frikën janë kriminelët autorë të krimeve të rënda që ecin lirisht në rrugë çdo ditë.
Persona si Arben Frroku, që vrau një shef policie, por, në mënyrë të mistershme, u lejua të largohej nga vendi ndërsa ishte në pritje të apelimit në gjykatë.
Persona si trafikanti i dënuar për drogë Emiljano Shullazi, që është akuzuar haptazi në media për trafikim të vazhdueshëm të narkotikëve dhe vrasje, por nuk është çuar përpara drejtësisë.
Dhe persona si Sokol Mjacaj, i cili u dënua për vrasjen e një djali 13-vjeçar, por që më herët u lirua në mënyrë të dyshimtë nga burgu dhe më pas vrau një çift çek pranë Thethit.
Këta lloje personash duhet të kenë frikë nga një sistem drejtësie funksional”, tha Lu.
Ndërkohë, ambasadori amerikan tha me tej se:
“Së fundi, kam kuptuar se disa personave mund t’iu jetë thënë prej shefave të tyre se çfarë duhet të thonë, ose më keq akoma, se çfarë nuk duhet të thonë.
Nëse kjo është e vërtetë, më kujton më shumë të shkuarën komuniste të Shqipërisë sesa të ardhmen e saj demokratike”.
Në tryezë merrnin pjesë ekspertë të nivelit të lartë, prokurorë, gjyqtarë, dhe ekspertë të drejtësisë penale. Por, ajo që binte në sy, ishte fakti se kryeprokurori Adriatik Llalla nuk ishte i pranishëm.
/tesheshi.com/
