E mrekullueshme, fantastike…, çfarë klasike!
Një super ndeshje, një super rezultat për Barcelonën!
Ngjet kështu vetëm në Spanjë! Barcelona shndërrohet nga një skuadër e fjetur ndaj Juventusit në një vrasëse ndaj Realit. E ku se? Mu në “Santiago Bernabeu”!
La Liga është rihapur nga e para. Reali dhe Barcelona janë barazuar me pikë në kryesim, veçse madrilenët kanë një ndeshje më pak.
Lionel Messi ka qenë i magjishëm sonte, siç kanë qenë portierët e dy ekipeve, si Navas dhe Ter Stegen, pa pritjet e të cilëve rezultati do të kishte qenë krejt ndryshe.
Në fund, 2-3 për Barcelonën! Dy gola të Leo Messi-t, i pari si në play station.
Ndeshja do të kishte këtë rrjedhë: në të 28-n minutë shënon Casemiro pas një ngulmimi të gjatë të Realit në lojë, Messi barazon pesë minuta më pas, Rakitic lëshon një predhë në minutën e 73-të nga jashtë zonës, që përfundon në rrjetë, James Rodriguez lë përshtypjen se po shkohet drejt një barazimi me një gol të minutës së 85-të, dhe marshimi i Sergio Roberto-s në minutën e 92-të përfundon me golin e Messi-t.
Sergio Ramos do të dilte me të kuqe pak pas nisjes së çerekorëshit të fundit të lojës, por nëse arbitri do të ishte treguar më i rreptë, njësoj mund ta kishte pësuar dhe Casemiro shumë më herët.
El Clasico ishte vërtet e tillë sonte: El Clasico! /tesheshi.com/
