Pas një pauze të gjatë, Gëzim Ostreni përsëri kthehet në fokusin e ngjarjeve politike në Maqedoni, tashmë si kryetar i UNITETI-t.
Por jo vetëm kaq, ai rikthehet dhe me gjuhën brisk, pa kursyer as ish-shokun e armëve, Ali Ahmeti. Në një deklaratë të fundit, ai ka thënë se BDI ka ndërruar principet demokratike me praktika korruptive, për çka edhe ai ka dhënë dorëheqje dhe ka vendosur të qëndrojë në krye të subjektit të ri politik.
“Kur ndjeva se nuk po plotësohen idealet dhe arsyet për të cilat bënim përpjekje gjatë viteve 2001-2006, përfundova se ishte e nevojshme formimi i një subjekti të ri politik. Atëherë konstatova se partia ime amë nuk kishte më kapacitet të riorganizohet dhe se e ka humbur ndjenjën për zhvillimin e demokracisë në vend. BDI është vasale e VMRO-DPMNE-së. PDSH-në nuk do ta kisha komentuar se siç tha edhe kreu i kësaj partie ata janë “do smrt” me Mijallkovin”, ka deklaruar Ostreni.
Ai është shprehur i dëshpëruar nga moszbatimi i Marrëveshjes së Ohrit, nga krimi organizuar që lidhet me qeverinë në të cilën merr pjesë edhe BDI-ja, si dhe nga presionet me të cilat ballafaqohen qytetarët. Por, nga ana tjetër ai thotë se i vjen mirë që nëpërmes “bombave” doli një pjesë e së vërtetës.
“Ne jemi të lumtur që Zaev ka publikuar manipulimet dhe krimet që kanë ndodhur në shoqërinë tonë”, ka theksuar Ostreni.
Ostreni ka mohuar edhe të gjitha zërat se partia e re UNITETI është formuar për nevojat e BDI-së, duke i quajtur të gjitha këto spekulime dhe budallallëqe.
“As unë as Ahmeti nuk jemi adoleshentë. Ato janë dezinformata dhe ‘Uniteti’, konkretisht kundërshton politikat e tyre dhe nuk kemi ndërmend t’u japim vota as Ahmetit e as Musa Xhaferit. Nuk kam koment për ta edhe pse njëri prej tyre relativisht është i njohur në opinion për aktivitete kriminogjene. Thjesht, nuk kam koment, sepse ato zëra janë budallaqe”, ka thënë Ostreni. /tesheshi.com/
