Ambasadori amerikan në Shqipëri, Donald Lu, i është përgjigjur menjëherë një sulmi që ka ardhur nga qarqe pranë opozitës të cilat kanë përhapur një lajm sikur ai është nën hetim në SHBA për lidhje me George Soros.
Sipas tij, të gjithë “fajin” e ka reforma në drejtësi.
Reagimi i plotë i ambasadorit Lu për Zërin e Amerikës
“Kritikët e reformës në drejtësi i kanë etiketuar veprimet e Ambasadës së SHBA si të frymëzuara nga Soros, edhe pse ne nuk ofrojmë financim për Fondacionet Shoqëria e Hapur (OSF), as nuk marrim ndonjë financim nga OSF.
Siç e kemi thënë më parë, Shtetet e Bashkuara mbështesin reformën e gjyqësorit në Shqipëri sepse është në interesin tonë kombëtar për ta bërë këtë.
Kur Shqipëria të ketë një sistem gjyqësor të pastër, do të jetë një aleate më e fortë në NATO. Do të jetë më pranë anëtarësimit në BE. Dhe reforma e gjyqësorit është edhe në të mirën e interesave të nënshtetasve dhe bizneseve amerikane në Shqipëri. Amendamentet për reformën e gjyqësorit në kushtetutën e Shqipërisë u miratuan unanimisht nga të gjitha partitë politike të Shqipërisë”.
Një media pranë opozitës në Tiranë shkruante sot se në SHBA ka nisur një hetim ndaj Donald Lu-së.
Në fakt historia është krejt ndryshe.
“Judicial Watch”, një OJF e djathtë në SHBA ka kërkuar që të hetohen fondet që Soros ka dhënë për administratën Obama. Dhe këtë ajo e bën në kuadër të fushatës elektorale për zgjedhjet parlamentare në SHBA.
Lajmin e ka dhënë vetëm Fox Neës, një TV i shpallur hapur si i djathtë. /tesheshi.com/
