Kur vjen puna te martesa dhe ahengjet, shqiptarët nuk mendohen dy herë për të nxjerrë para nga xhepi, madje ka edhe nga ata “qeflinjë” që marrë edhe kredi e borxhe.
Sipas një raporti të publikuar së fundmi nga Departamenti për Popullsinë i Kombeve të Bashkuara janë listuar shtetet që shpenzojnë më shumë për ceremonitë e martesave. Megjithatë, popullariteti i martesave dallon shumë nëpër botë. Sipas raportit shpenzimet më të larta për dasma bëhen në vendet e Lindjes së Mesme, si dhe në shtetet post-komuniste.
Për sa i përket Evropës, Shqipëria renditet e katërta me koeficient 8.9 pikë nga 10 që është maksimumi, duke lënë pas edhe Turqinë që e ka koeficientin 8. Shtetet që harxhojnë më tepër në kontinentin tonë janë Azerbajxhani dhe Bjellorusia.
Ndërkohë, realiteti i shqiptarëve ofron një tjetër panorame, atë të divorceve përballë gjithë këtyre ceremonive të bujshme për martesa.
Shifrat e INSTAT tregojnë se ndër vite ka pasur një tendencë rritëse të divorceve. Sipas të dhënave të Gjykatës, në vitin 2013, numri i divorceve në Shqipëri ka qenë 3747, ndërsa në vitin 2014 ishte 4240, me një rritje prej 12.3%.
Arsyeja kryesore e ndarjeve në shumicën e rasteve është varfëria, një një paradoks i shoqërisë shqiptare përballë shenzimeve marramëndase për dasma./tesheshi.com/
