Nga Blendi Gashi
Jo pak parregullsi ka gjetur Auditi i Përgjithshëm në ministrinë e që drejtohet nga Bekim Çollaku i PDK-së.
Vërejtjet kryesore të evidentuara në raport janë anashkalim i procedurave në prokurim, mbajtje e pozitave me ushtrues detyre, mos planifikimi i mirë i shpenzimeve të qirasë etj.
Një e gjetur nga Auditi në MIE tregon më së miri se si keqpërdoren paratë e shtetit.
Saktësisht 3.934 euro ministria e Çollakut pagoi për trajnim dy ditor për dy zyrtarë në Bruksel, me temën “Pasqyrat Financiare dhe Analiza e Performancës, përfshirë këtu edhe shpenzimet e udhëtimit.
Auditi tërheq vërejtjen se ky trajnim afatshkurtë (dy ditor) nuk justifikon shpenzimet e bëra.
Anashkalim i procedurave në prokurim
Si edhe shumë ministri tjera edhe e Integrimeve sipas raportit ka anashkaluar procedurat e hapura të prokurimit, me rastin e nënshkrimit të një marrëveshje me një operator të shërbimeve të telefonisë mobile.
Afati i kësaj marrëveshje është tre vjeçar, me obligim që MIE të paguajë minimum shumën mujore prej 1,586 euro.
Auditori tërheq vërejtjen se forma e tillë e kontraktimit është jo transparente dhe ndikon në eliminimin e konkurrencës së tregut për të siguruar shërbime me çmime më ekonomike.
Edhe në MIE pozita me ushtrues detyre
Ndërsa ligji parasheh që një pozitë me ushtrues detyre nuk mund të mbahet më shumë se tre muaj, në dikasteret qeveritare ndodh që një gjë e tillë të bëhet me vite të tëra, kuptohet në kundërshtim me ligjin.
Një pozitë menaxhuese në këtë ministri është me ushtrues detyre që nga muaji gusht i vitit 2015, pra duke shkelur ligjin.
Auditi thotë se mbajtja e pozitave me ushtrues detyre për më tepër se tre muaj është në kundërshtim me kornizën ligjore, dhe se kjo formë e udhëheqjes nuk siguron se detyrat po realizohen me kompetencë dhe përgjegjësi të plotë.
Auditi i rekomandon ministrit Çollaku të bëhet një zgjidhje e qëndrueshme për pozitën në fjalë dhe në pajtim me kërkesat ligjore.
Sfidë tjetër për MIE-në janë shpenzimet përtej vlerës së lejuar me aneks kontratë.
“Para përfundimit të kontratës kornizë “Shërbime të përkthimit”, MIE nënshkroi aneks kontratë, e cila kishte vazhduar për shtatë muaj. Gjatë kësaj kohe, ishin shpenzuar 24,903€ apo 24% të shpenzimeve të ndodhura me kontratën bazë (100,518€), duke tejkaluar në këtë rast limitin prej 10% të përcaktuar me legjislacionin3 aktual përkatës”, thuhet në raport.
Andaj, ministrisë së Çollakut i rekomandohet të sigurojë që blerjet përmes aneks kontratave të mos tejkalojnë limitin e lejuar nga vlera e kontratës bazë.
E gjetur tjetër e Auditit në këtë ministri është edhe pagesa pas afatit të rregulltë prej 30 ditëve nga pranimi i faturës apo mallrave dhe shërbimeve.
Ministria në fjalë shpenzimet e informimit publik në vlerë 77,850€, i ka paguar tetë ditë pas afatit kohor ligjor; dhe obligimin e muajit dhjetor 2014 për shpenzimet e derivateve në vlerë 1,230 euro. Ky borxh nuk ishte raportuar në Ministrinë e Financave/Thesar si obligim i papaguar për muajin janar 2015, ndërsa pagesa ishte kryer në fund të muajit shkurt./tesheshi.com/
