Nga Gjon Neçaj
Pas shqiponjës, duket se plisi është simboli i dytë kombëtar i cili po aktivizohet fuqishëm ndër shqiptarë në funksion të ushqimit nacional tipik ballkanas, sigurisht në emër të krenarisë kombëtare.
Thirrja “Me plis në Paris” që shndërrua në kredo mbarëkombëtare menjëherë pas kualifikimit të Shqipërisë për në europianin e futbollit ‘Francë 2016’, nuk qe krejt e rastësishme.
Ja, fjala vjen, kemi Ditën e Plisit, një aktivitet mbarëkombëtar që u zhvillua për të dytin vit rradhazi në Klinë të Kosovës.
Ideatori dhe organizatori i këtij evenimenti është drejtuesi i kulturës, krijuesi dhe aktori Ismet Krasniqi, i cili me përkrahjen e këshillit komunal dhe kolegëve të tij, Prend Buzhala, Gjon Gjergjaj dhe Idriz Berisha, ka bërë të mundur zyrtarizimin dhe si të përvitshëm të këtij aktiviteti.
Dje, në Dobërdol, në odën e kullës së Zenel Hasan Berishës, u shënua edicioni i dytë i Ditës së Plisit, me të ardhur nga të gjitha krahinat shqiptare, ku nuk mungoi kënga patriotike, lahuta e çiftelia, ndërkohë që disa studiues folën për rëndësinë e plisit si simbol identitar.
Ata konkluduan se plisi i bardhë, i quajtur dhe qeleshe, zë vend të rëndësishëm në trashëgiminë kombëtare, kurse në Kosovë është evidente ruajtja dhe trasmetimi ndër breza i kësaj tradite, pra mbajtja në kokë e plisit të bardhë.
Madje ata shkuan dhe më tej kur shpalosën idenë se duhet të jetë pikërisht plisi që duhet të hyjë nën mbrojtje të UNESCO-s, nëse është fjala për monumentet e rralla të trashëgimisë që posedon Kosova
Dhe për këtë, u shplaosën dhe ide më të guximshme rreth “shenjtërisë” së plisit, ku njëra qe lashtësia e tij, e tjetra prania këtij simboli deri tek kupola e botës katolike, Vatikani, tek vet Papa.
Për tesheshi.com, organizatori i aktivitetit, Ismet Krasniqi, tha se plisi ka ekzistuar te shqiptarët që në kohën e ilirëve. Sipas tij, ekzistojnë foto të vjetra për këtë fakt, si në dyluftime, në meshë në kishën e Deçanit, në afresket e kishave të hershme, që janë pra me plot gjurmë të plisit që mbahej në kokë formën e vet orgjinale.
Madje, sipas studiuesve, edhe kësula e bardhë që mban Papa në kokë, ka diçka prej plisit, qeleshes tonë të rrumbullakët, që mbahet në Shqipërinë veriore dhe në Kosovë. Kjo u lidh me faktin se në fillim të shekullit XVIII-të u zgjodh papë Klimenti XI, që kishte prejardhje shqiptare, nga fisi Kelmend. /tesheshi.com/
