Organizata joqeveritare “Ec Ma Ndryshe”, dhe organizata të tjera të shoqërisë civile në Kosovë i kanë drejtuar sot një letër kryeministrit Isa Mustafa dhe ministrit Ljubomir Mariq, përmes së cilës kërkohet suspendimi i Ramadan Mujës nga pozita e kryetarit të Prizrenit.
Drejtues të OJQ-ve, përmes një konference të mbajtur para ndërtesës së qeverisë deklaruan se Mujës, po i afrohet fundit të mandatit si një kryetar i dënuar për keqpërdorim të detyrës zyrtare. Sipas OJQ-ve, derisa Muja nuk po jep dorëheqje, qyteti është degraduar në një qeverisje kriminale.
OJQ-të kanë kërkuar nga kryeministri që të suspendojë Mujën nga detyra e kryetarit në bazë të ligjit, sikurse liroi ministrin Ferid Agani.
“Largimi i Ramadan Mujës nga pozita publike do të përbënte një precedent pozitiv për qeverisjen demokratike në Kosovë dhe do të tregonte vullnetin tuaj për të siguruar qeverisje me duar të pastra në vendin tonë”, thuhet në letrën publike. /tesheshi.com/
