Në një intervistë tronditëse për gazetën Corriere della Sera, shkrimtarja e njohur italiane Michela Murgia ka folur me ndershmëri çarmatosëse për gjendjen e saj shëndetësore. “Kam kancer në veshka në një fazë të avancuar dhe mjekët më thanë se kam vetëm pak muaj jetë”, tha autorja 50-vjeçare, me origjinë nga Sardenja.
Intervista tronditi Italinë dhe mijëra përdorues të rrjeteve sociale, por edhe personazhe publike, e komentuan atë, duke nënvizuar se është një forcë shpirti që lëviz, ngjall respekt dhe tregon, në të njëjtën kohë, se çdo moment i jetës duhet të karakterizohet nga dinjiteti absolut.
“Kanceri nuk është diçka që kam, është diçka që jam, është një aleat i kompleksitetit tim, nuk është një armik që duhet neutralizuar. Nuk mundem, nuk dua të luftoj trupin tim, veten time”, nënvizon Michela Murgia. Ajo shton se zgjodhi imunoterapinë, me bio-ilaçe, të cilat nuk ndikojnë në sëmundje, por favorizojnë reagimin e sistemit imunitar dhe mund ta lejojnë atë të fitojë kohë.
Siç shpjegoi ajo, në këtë fazë “nuk do të kishte kuptim t’i nënshtrohej një operacioni, sepse tashmë ka shumë metastaza”.
“Unë jam pesëdhjetë vjeç, por kam jetuar dhjetë jetë. Bëra gjëra që shumica dërrmuese e njerëzve nuk i bëjnë kurrë në jetë. Gjërat që as nuk e dija se i doja, kam kujtime të çmuara”, tha ajo.
Michela Murgia gjithashtu lë të kuptohet qartë se nëse e gjen veten në një situatë që nuk do ta lejojë të komunikojë me mjedisin përreth, do të zgjedhë rrugën e eutanazisë.
Autorja e së majtës, me referencë politike, në fund shtoi se “shpreson të vdesë kur Gorgia Meloni të mos jetë më kryeministre”, sepse konsideron se “qeveria e saj është fashiste”.
“Nuk e kam takuar personalisht dhe nuk i ndaj idetë e saj, por dua ta përqafoj Michela Murgia-n dhe t’i them që ne të gjithë e mbështesim…”, është përgjigjur Meloni përmes llogarisë së saj në rrjetet sociale. /tesheshi.com/
