Nga Miradie Hasani
Dy gjëra po e karakterizojnë Shkupin këtë fundvit: përballja e autoriteteve qeveritare me një padi, si dhe zbukurimi më në fund i një pjese shqiptare që kurrë nuk kishte parë llamburitje.
Qeveritarët lokalë të kryeqytetit maqedon, vendosën të anullojnë programin festiv, për t’i kaluar shpenzimet tek të vobektit.
“Mjetet financiare që janë planifikuar për organizimin e pritjes së Vitit të Ri, e të cilat janë rreth 2 milionë denarë, Shkupi do t’i dhurojë për qëllime sociale. Vendimi se ku do të donohen mjetet, do të merret nga Këshilli i Qytetit”, thuhet në njoftimin e autoriteteve lokale.
Por ky lloj humanizmi i zyrtar në vend që të përkrahet e përshëndetet, ka gjetur kundërshti tek komuniteti i artistëve, atyre që angazhohen atë natë.
Produksioni “AVALON” ka kërcënuar të ngrejë padi kundër Komunës së Shkupit.
“Nëse Qyteti i Shkupit heq dorë nga festa e pritjes së Vitit të Ri, (kurse këtë mund ta bëjë sepse këtë vit nuk paguan 100 mijë euro për ndonjë si Severina ose 50 mijë euro për ndonjë produksion të huaj) dhe me këtë i dëmton artistët e Maqedonisë dhe produksionin nga Maqedonia, atëherë produksioni AVALON do ta padisë Qytetin e Shkupit dhe do të kërkojë pagesën e plotë të të gjitha shpenzimeve. Gjithashtu për arsye humanitare, AVALON do të ndërmarrë peticion që kryetari Koce Trajanovski dhe punonjësit e Qytetit të Shkupit, rrogat e tyre gjashtëmujore t’ua dhurojnë të varfërve,” shkruan Millosheski në profilin e tij në facebook.
Për pritjen e Vitit të Ri në Sheshin e Shkupit ishte planifikuar pjesëmarrja e këngëtarëve: Karolina Goçeva, Mile Kuzmanovski, Adrijan Gaxha dhe repisti “Sllatkar”. Kurse përveç Shkupit, nga festa e pritjes së Vitit të Ri ka hequr dorë edhe qyteti i Velesit, Manastiti, Kumanovës, Kërçovës si dhe disa komuna tjera të Maqedonisë. Edhe në rrjetet sociale gjithashtu kishte kërkesa që në vend se të shpenzohen para për festa, të njëjtat të përdoren për aktivitete humanitare.
Ndërsa risi këtë vit ka qenë edhe stolisja e bulevardit “Cvetan Dimov”, që shtrihet në komunën me shumicë shqiptare, Çair. Ndonëse largësia e kësaj pjese me qendrën është vetëm 1 kilometër, ajo asnjëherë nuk është zbukuruar.
Banorët e Komunës së Çairit revoltoheshin se kur bëhet fjalë për fund vit, gjithmonë është dashur të dalin nga pjesa tjetër të Urës së Gurit, ku është qendra e Shkupit për të shijuar dritat e shumta që japin atmosferë festive.
Reagimet më të shpeshta të tyre janë:
“Fëmijët e mi gjithmonë kërkojnë prej meje sepse andej urës ka gjallëri, kurse pjesa ku jetojmë ne është sikur të jesh në ndonjë shkretirë. Asnjëherë nuk kam parë që ky bulevard të zbukurohet me drita të shumta, por vetëm para dyqaneve, ku vetë shitësit i kanë vendosur zbukurimet para vetes”, thotë një banor i Komunës së Çairit.
“Ky bulevard është shqiptar për shkak se zbukurohet vetëm me flamuj me shqiponjë në kohën kur është Dita e Alfabetit, kurse kur bëhet fjalë për festa të tjera askujt nuk ju ka interesuar të ndryshojnë këtë pjesë për të mirë”, thotë një tjetër banor. /tesheshi.com/
