Nga Mensur Krasniqi
Një qetësi shkretinore mbizotëronte këtë 1 janar në rrugët e frekuentuara të Shkupit. Pazari, Çarshija e vjetër dhe Qendra e qytetit, janë këto vendet të cilat ditë e natë vlojnë nga qarkullimi i madh i njerëzve, shumë më tepër natën e ndërrimit të viteve.
Thirrjet e disa grupeve besimtarësh muslimanë për të mos e festuar Vitin e Ri pasi konsiderohet si festë pagane, e drejtuar kjo kah komuniteti shqiptar i besimit musliman, duket se nuk kanë patur efektin e duhur.
Madje, sipas një perceptimi, Viti i Ri është festuar më së shumti nga shqiptarët në raport me vendbanime maqedonase. Dhe mënyra dihet: ajo me mjete piroteknike, kapsolla e fishekzjarre.
Dhe sipas një pjesë shqiptarësh, nga ata që konsiderohen si më të iluminuar e të përgjegjshëm, është një paradoks që festimet me të shumta ndër shqiptarë janë tek shtresat e njerëzve me gjendje të rëndë sociale.
“Unë habitem si është e mundur që buk nuk ka të haje, e nga ana tjetër bashkë me fëmijët e vet del t’feston duke gjuajt fishekzjarre. Dhe ta keni parasysh se zatem më së shumti çka shpenzojnë të holla për kështu gjërash janë këto fukara, turp i madh. Pastaj Zoti na dënon. Normal. Shumë është edhe kjo tokë që na mban”, shprehet i revoltuar një qytetar.
“Po tërë natën kanë hangër e kanë pi, e tash normal se s’mund të zgjohen gjithë ditën në gjum. Na mbuloi harrami”, thotë dikush tjetër, si për të shpjeguar heshtjen e qytetit një ditë më pas, ose më saktë atyre vatrave urbane ku zjen jeta e shqiptarëve.
Ndërkohë, bilanci i dëmtimeve ka qenë po ashtu trishtues. Sipas të dhënave të ofruara nga spitali shtetëror i Shkupit, 28 personave iu është dhënë ndihmë mjekësore për shkak të alkoolizimit; një tjetër është trajtuar nga mbidoza e drogës; dhe disa të tjerë janë mjekuar nga lëndime prej kapsolleve dhe aksidenteve ne komunikacion.
Gjithashtu, natën e ndërrimit të viteve janë regjistruar edhe katër raste vdekjesh në kushte shtëpiake të personave prej 40 dhe mbi 60 vjeç. /tesheshi.com/
